Urriak 22, larunbata: Pasai Antxoko kintoen eguna
50 urtetik gorako antxotarrentzat 'Kintoen festa' antolatzen ari dira 65ekoak. Interesdunei dei egin diete hilaren 21eko bilerara hurbiltzeko.
Bazkalostean dantzaldiarekin bete nahi dute frontoi zaharra. 
50 urtetik gorako antxotarrek gorriz marka dezakete dagoeneko urriaren 22a, larunbata, euren etxeko egutegietan, bizilagun talde bat Kintoen eguna antolatzen ari baita ordurako.
65eko kintoen ekimenez abiarazitakoa da festa eguna. Haietako batzuen burutapena izan baita, hain zuzen, deialdi zabala egin eta 50 urtetik gorako bizilagun guztiak gonbidatzea euren urte-kideekin bildu eta ospakizun bateratua egiteko.
Dagoeneko lehen hartu emana egin dute udal arduradunekin, eta eurek plana “begi onez” ikusi ez ezik, babesa ere eskaini diete antxotarrei.
Ospakizuna bitan banatzea aurreikusi dute hasiera batean. Horratx:
- Kinto bakoitzaren bazkari herrikoiak. Adin berekoen talde bakoitzak erabakiko du nola eta non egin bazkaria: jatetxe edo taberna batean, elkarteren batean, edo espazio publikoetan. Antolakuntzaren ardura talde bakoitzaren esku geratuko da.
- Dantzaldia. Arratsaldez egingo dute dantza, bazkalostean. Hasiera batean frontoi zaharra (Biteri plaza) proposatu dute gune nagusi gisa, Gure Zumardia obretan egongo baita. Talde herrikoi batek joko du musika, eta bertan, kinto guztiak nahiz jaialdiarekin bat egin nahi duen orok dantzatu ahal izango du. “Gainontzeko herritarrekin bat egiteko aukera izatea da ideia”, azaldu dute.
Irrikaz agertu dira antolatzaileak urriari begira: “Herrikideon arteko topaketa eta ospakizun handia izatea espero dugu”. Ildo horretan, antolakuntza lanetan martxan jartzeko deialdi irekia egin diete interesdunei: Kultur Etxean bilera egingo dute hilaren 21ean, osteguna, 19:00etan. “Bertan emango dizuegu Kintoen festaren inguruko xehetasun gehiago”, egin dute agur 65ekoek, “eskerrik asko eta laster arte!“.
