[Galeria] Prest dira pasaitarrak 22. Korrikari harrera egiteko
Eguzkia lagun, giro ederrean eman dute Korrikaren eguna Pasaiako lau barrutietako bizilagunek. Prest dira gauean lekukoa hartzeko.
Donibanen pintxo lehiaketa egin dute gaur arratsaldean. Eguratsa alde izanik, gogoa besterik ez zuten falta pasaitarrek 22. Korrikaren eguna hitzekin nahiz ekintzekin ospatzeko, eta bigarren hori ere soberan dutela argi gelditu da gaurkoan.
Korrika Txikiek bete zituzten atzoko arratsean Antxo, San Pedro eta Trintxerpe, eta gaur Donibane izan da jendez lepo egon dena egun osoan zehar. Haur eta nerabeek 17:00etatik hartu dute Meipi, eta musika nahiz joko artean, plaza ez da hustu. Izan ere, goizeko egitaraua euriagatik geroratzea erabaki dute, eta 18:00ak pasatxo zirenean ekin diote pintxo lehiaketari auzo horretako plazan bertan.
Atsedenik ez dute hartuko dagoeneko sanjuandarrek, 21:30ean afaria baitute Bixi-Bixi Elkartean, eta June Galardiren kantaldia gero. 01:00etan Andoni Oilokiegik emango du kontzertua, eta Korrikarekin 04:32an egingo dute bat, Termika zaharretik abiatuta.
San Pedron ere gazteenak izan dira protagonista euskararen aldeko egunean. 17:00etan hasi dituzte jolasak Ertin, lonja ondoko plaza berrian, eta arkupetan. Jarraian Pirata garrapataren abenturak antzerkiarekin hartu dute gozatua, eta buruhandiekin ere ibili dira korrika batetik bestera.
19:30eko herri trikiti-jotze poteoarekin hasi dira sanpedrotar ez-hain-gazteak gauerako berotzen, garrantzitsuena oraindik heltzear baita: 04:30ean salda beroa banatuko dute Antxetan Korrikarako prestatzeko, hori 05:01 denean helduko baita, aurreikuspenen arabera, barruti morera.
Antxotarrak izan dira beranduen hartu dutenak martxa. 19:00etan The Joselontxo’s txaranga Dani tabernatik abiatu da eta kuadrilla ederra eraman du atzetik dantzan. Hauek ere gauean dute hitzordu handia: ehundik gora lagun elkartuko dira Ibaiondo pilotalekuko afarian 21:30ean. Korrika hartzen azkenak izango dira antxotarrak, 05:10ean, Buenavistako biribilgunean.
Trintxerpetarrek gauerako egitarauan jarri dituzte indarrak. 22:00etan bertso afaria dute, Andoni Egaña eta Alaia Martinen eskutik, Trintxer elkartean. 02:00etan quizz musikatua, eta 04:30ean hitzordua Gudarien Enparantzan, 20 minutu ondoren batuko baitira euskararen aldeko martxara.
Jarraian, gaurko egunak Pasaian utziriko zenbait argazki:
