Mikel Arrizabalaga hil da, Lezoko alkate izandakoa
1987-1991 eta 1995-1999 agintaldietan Lezoko alkate izan zen Arrizabalaga. 69 urte zituela hil da gaur.
Mikel Arrizabalaga Pikabea, Lezoko alkate izandakoa, gaur hil da 69 urte zituela. 1987-1991 eta 1995-1999 agintaldietan Lezoko alkate izan zen, Herri Batasuna ordezkatuz. 1979-1983 agintaldian, berriz, zinegotzi izan zen Lezoko Independenteak taldekoa. Orduko hartan Patri Urkizu izan zen herriko alkate.
Koldo Mitxelena Institutuko irakasle izan zen, Historiakoa. Erretiroa hartua zuen Arrizabalagak, duela urte batzuetatik. Beti izan du Lezorekin konpromisoa, eta abertzaletasunetik eta euskaratik herriari asko-asko emandakoa izan da, herrigintzarekin konpromiso ukaezin eta sendoarekin. Mendizaletasuna zen bere beste pasioetako bat. Jaizkibel mendia zen haren bigarren etxea, maiz zebilen Jaizkibeldik harantz eta honantz.
