Haurrengan sormena pizteko egitasmo aitzindaria abiatuko dute
Filosofiaren Plaza egitasmoa jarri du martxan Lekuona Fabrikak 9 eta 12 urte bitarteko gazteek sormenaren taupada piz dezaten.
Lekuona Fabrika. Haurrengan sormenaren taupada pizteko Filosofiaren Plaza egitasmo aitzindaria abiatuko du Lekuona Fabrikak datozen asteetan. Horretarako, 9 eta 12 urte bitarteko haurren (Lehen Hezkuntzako 4., 5. eta 6. mailako ikasleak) sormenaren taupada deskubritzen edo sustatzen laguntzeko, pentsamendu filosofikoa eta artea bat egiten dituen proiektua jaio da.
Hainbat hilabeteetan luzatu den prozesua apirilaren 29an hasiko da, eta hori izango da zortzi saioetan lehena. Egitasmoa ekainaren 17a arte luzatuko da, saioak ostiraletan izango dira, eta izen-emateak irekita daude dagoeneko Kultura Kreatiboaren webgunean.
Saio horietan haur talde finko bat eratuko da, eta astero izango dute hitzordua parte hartzaileek. Gazteak 17:30etik 19:00etara elkartuko dira Lekuona Fabrikako Plaza Horian, eta astero diziplina bat ezagutzeko aukera izango dute sortzaile ezberdinen eskutik. Antzerkia, musika, margolaritza, jostailuen diseinua, literatura eta ipuin kontatzailearen esparruak inguratzen dituzten prozesuak, aurrekariak, zergatiak eta produktuak aurkeztuko dizkiete. Hortik abiatuta, elkarrizketa filosofikoan arituko dira, proiektua sortu duen Jakinmin elkarteko kide bat bidelagun dutela, eta gazteek sormenaren inguruko hausnarketa propioa egin ahal izango dute.
Saio bakoitzaren bigarren zatian sortzeko aukera izango dute haurrek. Diziplina ezberdinekin lotutako materialak izango dituzte, eta, askatasunez, sormen propioarekin esperimentatzen hasteko aukera izango dute.
Filosofiaren Plaza egitasmoan, Ainara Gurrutxaga eta Urko Redondo aktoreek, Xabier Obeso eta Ibai Maritxalar margolariek, Idoia Hernandez musikariak, Joxemari Carrere ipuin kontalariak eta Eva Diaz de Isla jostailu diseinatzaileak hartuko dute parte, eta haurraren pentsamenduaren pizgarri izango den dinamika bat prestatu du sortzaile bakoitzak.
