[Erreportajea] 2,6 milioi eurogatik erosiko du Pasaiak Luzuriaga
Dagoeneko tasatu dute etorkizunean antxotarrentzako kultur azpiegitura izango den eraikin zaharra. Gaiaren gaineko azken kudeaketen berri eman du Izaskun Gomez alkateak. Prozesu «motela» da; itxaron baino ezin.
Egun Luzuriagaren jabe diren erakunde guztiek onetsi behar dute tasazioa. 
Pasai Antxoko Luzuriaga enpresaren bulego zaharren azpiegiturari salneurria ipini diote: 2.600.000 eurotan tasatu dute, eta etorkizuneko espazio kultural horrek zein zerbitzu hartuko dituen erabakitzeko parte hartze prozesua «ahalik eta lasterren» abiaraziko da. Horiek Izaskun Gomez alkateak emandako azken berriak.
Azalpenak joan den astearteko osoko bilkuran eman zituen Gomezek, EH Bilduko zinegotzi Mikel Garciak udalburua zuzenean interpelatu zuenean, gaiari buruzko azken aurrerapausoen berri eman zezan: «Eraikina erosteko negoziazioen berri izan nahiko genuke. Bai eta azpiegitura egokitzeko planen, prozesu parte hartzailearen, eta ekintza egutegiaren berri ere».
Kreditu Ofizialeko Institutuak (KOI) enkargaturiko tasazio txostenak 2,6 milioi euroko prezioa jarri zion Luzuriagari. Erakunde horrek azpiegituraren %80tik gorako jabegoa du, Nafarroako Gobernuarekin eta Gipuzkoako Foru Aldundiarekin partekatuta. Dokumentu hori beste jabeek ere onetsi behar izan zuten salerosketarekin aurrera egin ahal izateko.
Nafarroako Ekonomia eta Ogasun kontseilariak dagoeneko bere egin du tasazio txostena, eta erabaki horregatik poza adierazi du Pasaiako alkateak, «tasazio berri bat egiteak atzerapena suposatuko bailuke». Andrea Salaberri, Pasaiako udal arkitektoak bide beretik jo du, eta aldundiak du, beraz, azken hitza. Gaur bertan, ostirala, da biltzekoa Izaskun Gomez Rafaela Romero Mugikortasun eta Lurralde Antolaketako diputatuarekin azken hitzartze horretarako.
6 milioiak
Iaz EH Bilduk 6.000.000 euroko funtsa adostu zuen Madrilgo Gobernuarekin Luzuriaga fabrikaren eraikinean proiektu kulturala martxan jartzeko, 2022ko Espainiako Aurrekontuen barruan. Kapital horren egoerari buruz ere eman zituen azalpenak Pasaiako Udalaren eledunak azken udalbatzarrean.
«6 miloi horiek sastre-kutxa batean zeuden sartuta, Espainiako Gobernuak Legebiltzarreko gainontzeko alderdiekin akordatutako gainontzeko zuzenketekin batera», azaldu zuen. Espainiako Ogasun Ministerioa da horiek banatzearen arduradun, eta dagoeneko bideratu du Luzuriagako funtsa dagokion departamentura: Kultura Ministerioaren ardurapean dago orain dirua. «Bertako arduradunak epe bat eskatu dit beharrezko mekanismoak martxan jartzeko», Gomezek. «Pasaiako Udalean batzuetan motelak gara, baina bistakoa da ministerioa are mantsoagoa dela».
Parte hartze prozesua, aurrerago
Luzuriagaren etorkizuna erabakitzeko parte hartze prozesuari buruz galdetu dio berriki SOS Antxo Koordinakundeak alkateari, eta atzerapenaren zergatiak azaldu zituen hark osoko bilkuran, izan ere, aste honetan aurreikusia zegoen antxotarren iritzi eta eskaerak jasotzen hastea, baina prozesua geroratu dute.
«Zenbait gai ditugu oraindik zehazteko», aitortu du alkateak, «eta beraz, prozesua ahaztu gabe eta jakinda zerbitzua kontratatuta dagoela jada, aurreragorako utziko dugu. Datorren astean elkartuko naiz enpresaren arduradunarekin».
