Bigarren kultur teknikariaren harira, herriko kultur beharren gaineko gogoeta eskatu du Lezoko EH Bilduk
Atzoko udalbatzarrean bigarren kultur teknikari baten postua sortzea erabaki zuen udal gobernuak. Koalizioa horren kontra dago.
Atzo, osteguna, ezohiko udalbatzarra egin zuten Lezoko zinegotziek, bi puntukoa. Horietako batek harremana zuen udaleko plantillarekin. Bada horretan, udal gobernuaren proposamenez, kultur teknikari postu berri bat sortzea erabaki zen, herriak izango lukeen bigarrena. “10.000 biztanleko herrien artean, bi kultura teknikari izango dituen herri bakarra bihurtuko da Lezo”, zehaztu du EH Bilduk. Haren soldataren kostua 60.000 eurokoa izango litzateke urteko. Hala, EH Bilduren kezka bi aldekoa da: batetik aspaldikoa da koaliziokideen desadostasuna pertsonal gastuak handitu egin direlako azken urteetan; bestetik, herriko kultur ereduaren gaineko gogoeta egiteko gonbita egin dio udal gobernuari.
Gonbita atzoko plenoan bertan egin zion, koalizioak prentsa ohar bidez adierazi duenez, udal gobernuari. Izan ere, bilkideek gogoetaren oinarri gisa datu bat erabili dute: 2015etik 2022ra, kultura emankizunak kontratatzeko diru partida 27.000 eurotik 125.000ra igo egin du udalak: kontra, diru ekarpen handiena jasotzen duten herriko bost kultur eragileen diru laguntza 39.000tik 46.000ra hazi da, “kultur eragileen ekarpena ez da apenas handitu urte horietan”, nabarmendu du Euskal Herri Bilduk. Horiek horrela, ideia garbi bat azaldu du alderdiak: “Kultura ekitaldietan ere inbertitzearen alde gauden arren, ez dugu uste bigarren kultura teknikaria denik orain Lezok behar duena”.
Beraz, atzoko udalbatzarrean galdera zuzen sorta egin zion EH Bilduk gobernukideei: “Hori al da Lezok behar dun kultura eredua? Zer lortzen du Lezok eredu horrekin? Herri bizitza indartzeko egokia da? Zer behar dauzkate herriko kultur eragileek?”. Galdera horien erantzunen bila, bi aldeko prozesua abiatzea planteatu zuen udalbatzarrean koalizioak, gobernu taldeak baztertu egin zituenak. Batetik, herriko eragileekin herriko kultur ereduaren gaineko gogoeta konpartitua egitea proposatu zuten; eta hori egokitzat eman ezean, teknikari berriaren jarduna justifikatuko lukeen egitasmo zehatza lantzea proposatu zuen, denboran muga izango lukeena (“gehienez hurrengo hauteskundeetara bitartean”).
Bigarren teknikariaren gastu ekonomikoan azpimarra jarriz, EH Bilduk uste du udaleko pertsonal gastuak gehiegi hazi direla azken urteetan, “eta herriko baliabideak premiazkoak izan daitezkeen bestelako lehentasun batzuetan inbertitzea eragozten du. Udal gobernua herritarron diru baliabideekin arduragabe jokatzen ari da”.
