Enkantean aterako dituzte Trintxerpe eta Antxoko azoketako hainbat postu
Hilaren 18ra arte eman ahalko da izena udal azoketan hutsik dauden salmenta postuen enkantean parte hartzeko.
![](https://oarsoaldea.hitza.eus/site/files/2022/05/dsc00346.jpg)
Trintxerpe eta Antxoko udal azoketan hutsik dauden zenbait salmenta postu enkantean aterako dituzte. Lehen barrutiko 1., 6., 7., 8. eta 9. postuak dira bete nahi direnak, eta beste barrutiko 3. postua.
Bihartik hasita, asteazkenarekin, hilaren 18ra bitarte edukiko dute aukera interesdunek enkantean parte hartzeko izena emateko. HAZ bulego batean edo online eskabidea aurkeztearekin batera, 50 euroko behin-behineko depositua jarri beharko dute.
Aipaturiko epea iraungita, kontratazio mahai bat eratu eta zozketa egingo da. Eskatzaile bakoitzak esleitzea nahi duen postua aukeratu ahal izango du, zozketan ateratako hurrenkeraren arabera. Postuetan honako salmenta jarduera hauek egin ahalko dira: harategia, urdaitegia, arrandegia, fruta- eta barazki-denda, gazta- eta arrautza- denda, lore-denda, eta okindegi eta gozotegia.
Esleipenak egin ondoren, postuak urtebeterako emango dira, urtero kontratua luzatzeko aukera eskainiko delarik, harik eta beste ordenantza bat indarrean sartu arte. Udalaren webgunean jasota dago enkanteen prozedurari buruzko informazio guztia, bai eta postu horien kokalekuak, neurriak eta hileko kostuak ere.