[Galeria] Panierreko eta Lekuonako zubiak lotu ditu Sareren giza kateak
'Etxerako bidean zubiak sortzen' lelopean, jendetza bildu da presoen eskubideen alde eta salbuespenezko espetxe politikaren aurka kilometroak egiten jarraitzeko.
Sareko giza kateak Panier eta Lekuonako zubiak lotu ditu. Sare Herritarra Izan Bidea dinamikaren barruan antolatutako ekintzak gauzatzen dihardu. Dinamika horren helburua da Euskal Herriak adina kilometro osatzea, guztira 3.127.326 kilometro egiteko presoen eskubideen alde eta salbuespenezko espetxe politikaren aurka. Gaurkoan, Errenteria-Oreretako Sare Herritarrak erdiguneko zubiak lotu dituen giza katea egin du. Jendetza hurbildu da, eta denen artean Panier eta Lekuonako zubiak lotu dituzte ‘Etxerako bidean zubiak sortzen’ lelopean. Horrez gain, bete dituzten kilometro horiek Izan Bidearen aplikaziora gehitu dituzte, herri bakoitzak dinamikari bere ekarpena egiteko.
Giza katearen erronkarekin, Sareko kideek erakutsi nahi izan dute, “euskal presoei ezarritako salbuespenezko espetxe politika bertan behera uzteko herri honek duen nahia, mugimenduaren bitartez, aktibazioaren bitartez, kilometroak eginez”. Hein handi batean, helburu horiek lortzen ari direla eutsi dute, eta azken bi urteetan espetxe politikaren baitan urrats garrantzitsuak eman direla baietsi dute: “40 urte luzez ezarritako urruntze politikarekin bukatzen hasiak gara eta isolamendua eta lehen gradua iraganean geratu dira. Lorpen hauek urte guzti hauetan egindako lanaren eta kalean bildutako herritarren bultzadaren fruitua dira, eta horregatik, eskerrak eman eta bide honetan urratsak ematen jarraitzeko eskatu nahi dizuegu”.
Salbuespenezko espetxe politika atzean uzteko urrats nabarmenak eman badira ere, Sareko kideek azaldu dute egiteko duten bidea oraindik luzea dela: “85 dira oraindik Euskal Herritik kanpo dauden euskal presoak. Hirugarren gradua eta baimenak eskuratzeko bidea oztopoz josia dago eta gaur gaurkoz gutxi dira progresio hori eskuratzea lortu duten presoak. Oraindik 19 larriki gaixo diren preso daude espetxean eta gurasotasunak espetxean zailtasunez beteriko aukera ematen du”.
Bide horretan trabak izango dituztela ziur dira Saren, “baina bidea hasia dugu, arrakalak zabalik dira hormetan, eta etxeratze prozesua inoiz baino egingarriagoa da orain arte moduan lanean eta urratsak ematen jarraitzen badugu”, nabarmendu dute.
Urratsak ematen jarraitu nahi dute
Izan Bidea proiektuari urriaren 8an emango zaio bukaera, eta bitartean, “gurekin urratsak ematen jarraitzera” animatu dute jendea, “gure buruei ezarritako erronka burutu bitarte”. “Kalean gaude, aktibo, mugimenduan, ezberdinen artean akordioak eginez, esperientzia eta bizipen kontrajarriak izan ditugunon artean hitz eginez, batuz, enpatia ariketa sendoak garatuz. Elkarbizitzarako eta bakera bidea egiten ari gara, salbuespen neurriak salatuz eta legedi arrunta exijituz, euskal presoei dagokien etxerako bidea egiteko ateak zabaltzen ari gara”, gaineratu dute plataformako kideek.
