Antxoberfesten ospatzeko asko dauka SOS Antxok
Herritarren eskubideen aldeko koordinakundeak aldarrirako ere baliatuko du jaialdia. Zelebratzeko motibo aski badituzte.
Karpa Ibaiondoko zabalgunean jarri dute aurten. Gaur arratsaldean irekiko dituzte ateak. 
Datorren asteburua ospatzeko baliatuko dute antxotarrek, bi urteko etenaldiak egarri baititu bizilagunak, eta hori asetzeko asmoz irekiko ditu ateak gaur bertan Antxoberfesteko karpak, Ibaiondoko zabalgunean.
Garagardo eta parranda zaleak ez dira kaleak hartuko dituzten bakarrak izango -edo ez, behintzat, asmo bakar horiekin-, SOS Antxo Koordinakundeak data berezia probestuko baitu, behin berriro ere, bertako bizilagunen aldarriak bistaratzeko; oraingo honetan, ordea, ospatzeko asmoz egingo dute hori.
Aski da topoa lurperatzeko lanen berri eman zenetik herritar talde horrek borrokatu duena, eta makala ez, gero, erdietsitakoa. Hori aintzatesteko egunak ere izango dira datozenak. Biba gu eta gora Antxo! lemapean bi lorpen nagusi nabarmendu nahi dituzte: Luzuriaga herriarentzat berreskuratu izana eta biaduktua eraisteko konpromiso politiko erreala lortu dutela.
Etorkizunari buruz hausnartzeko
Gaur arratsaldean bizilagunen aurrean lehen hitza hartuko badute ere, egun handia larunbatekoa izango du koordinakundeak. Etorkizunean zer-nolako barrutia nahi den hausnartzeko erakusketa jarriko dute ikusgai Ibaiondo pilotalekuan, eta gonbidatu bereziak ere ekarriko dituzte garagardoaren festara: EHUko Arkitekturako 5. mailako zenbait ikasle.
Lehen hari-muturrari dagokionez, iraganeko Antxoko zenbait argazki historiko jarriko dituzte ikusgai, gaur egungo zonalde horietako irudien alboan; bi horien jarraian, koadro txuri bat egongo da, bakoitzak desio duen etorkizuneko barrutia irudika dezan bere baitan. Informazio panelak ere zintzilikatuko dituzte, taldeak Luzuriagari buruz proposatzen duen parte hartze prozesu loteslearen berri emateko.
Imajinaziozko ariketa horretan lagun izango dituzte arkitekturako azken urteko ikasleak. Horiek Antxora gerturatuko dira larunbatean, eskuartean duten proiektua jendaurrean jartzeko. Barrutiaren zabalguneek etorkizunerako eskain ditzaketen zenbait aukera irudikatuko dituzte eta bisualki erakutsiko dizkiete bizilagunei, datozen urteotako obrak pasata, zer-nolako bizitokia izan ahalko luketen amestera gonbidatzeko.
Larunbateko 12:00etan Biteri plazan elkartu eta bertatik Luzuriagara egingo dute bidea 13:00ak aldera, joko eta kalejira giroan. Gonbita luzatu die SOS Antxok bizilagunei, lortutakoak ospatu eta lortzeko direnak amestera batzeko. “Denon artean zubi bat eraikiko dugu!”, aurreratu dute.
