Egitarau zabalarekin dator Francisaldia zikloa
Gaurtik hasita, eta ekainaren 28a bitarte, jarduera ugari antolatu dira Francisen erailketaren 43. urteurrenean.
Iñaki Queralt eta Itziar Ostolaza, gaur ortzadar kolorrekin margotutako homofobiaren aurkako zebrabidean. Errenteriako Udalak, LGTBI+ mahaiarekin elkarlanean, lehen aldiz antolatu du Francisaldia zikloa, LGTBIfobiaren nazioarteko eguna (maiatzak 17), Vicente Vadillo Francis-en erailketaren 43. urteurrena (ekainak 10) eta sexu askapenerako nazioarteko eguna (ekainak 28) barnebilduko dituen zikloa. Gaur goizean aurkeztu dute Itziar Ostolaza Berdintasun zinegotziak eta Iñaki Queralt LGTBIQ+ politiken zinegotziak ortzadarraren koloreekin margotutako homofobiaren aurkako zebrabidean, eta zikloaren inguruko xehetasunak azaldu dituzte.
Maiatza eta ekaina bitartean, ekintza ugari antolatu dira berdintasunerako eskubidearen eta sexu eta genero orientazioagatiko diskriminazio ezaren alde, aniztasunaren bizipen askea sustatzeko helburuarekin. Francisaldia zikloa gaur bertan hasiko da Zinegoak Elkarteak proiektatuko dituen zazpi film laburrekin. 19:00etan hasiko dira Niessen Kulturgunean, eta sarrera doakoa da. Egitarauak bihar izango du jarraipena Nos corps sont vos champs de bataille filmarekin. Proiekzio hori ere 19:00etan hasiko da Niessen Kulturgunean, eta sarrera doakoa da.
Zikloaren barruan antolatu den egitaraua anitza eta zabala da, eta jarduera ugari barneratu dira; hala nola, zineforumak, LGTBI+ ekintza planaren aurkezpena, LGTBI kontakizun erotikoen mikro irekia, Yogurinha Borovaren kontzertua Alabergako jaietan, bertso emanaldia, ipuin kontaketa, literatur solasaldia, transmarikabollo kalejira eta ortzadar banderaren igoera.
Honakoa da egitarau osoa:
- Maiatzak 12: Zazpi film laburren proiekzioa Zinegoak Elkartearen eskutik. 19:00etan, Niessen Kulturgunean. Sarrera doan.
- Maiatzak 13: Nos corps sont vos champs de bataille filmaren proiekzioa Zinegoak Elkartearen eskutik. 19:00etan, Niessen Kulturgunean. Sarrera doan.
- Maiatzak 16: Zineforuma, Great Freedom, OzZinema Elkartearen eskutik. 19:30ean, Niessen zinemetan. Sarrera 4 euro.
- Maiatzak 17: LGTBIfobiaren aurkako nazioarteko eguna.
- Maiatzak 24: Errenteriako LGTBI+ ekintza planaren aurkezpena. 18:00etan, Emakumeen Etxean.
- Maiatzak 26: Nerea Arriolak dinamizatutako LGTBI kontakizun erotikoen mikro irekia. 19:00etan, Lekuona Fabrikako plaza luzean.
- Maiatzak 28: Yogurinha Borovaren kontzertua Alaberga auzoko jaietan, 23:00etan.
- Ekainak 2: eRRe, aldarri bat bertsoz emanaldia. 19:00etan, Niessen Kulturgunean. Sarrera doan.
- Ekainak 7: Zineforuma, Tengo miedo torero, OzZinema Elkartearen eskutik. 19:30ean, Niessen zinemetan. Sarrera 4 euro.
- Ekainak 10: Francisen erailketaren 43. urteurrena.
- Ekainak 16: Bea Egizabalek dinamizatutako ipuin kontaketa euskaraz, Mari Errauskin Edurne Zurirekin maitemindu zen. 17:30ean, Lekuona Fabrikako plaza txikian.
- Ekainak 16: LGTBI+ solasaldiak Mari-mutil handi baten bluesa (euskaraz) eta Stone Buth Blues (gaztelaniaz) liburuenak. 19:00etan, Lekuona Fabrikako Udal Liburutegian.
- Ekainak 25: Transmarikabollo kalejira, 12:30ean, Alabergako biribilgunetik abiatuta. Ortzadar banderaren igoera, 12:30ean, Kaputxinotako biribilgunean.
- Ekainak 28: Sexu askapenerako nazioarteko eguna.
