Euskal Ligara igotzeko lehiari ekingo dio Pari Berrik bihar
Gipuzkoako Ligan nagusi bukatu dute sanjuandarrek. Igotzeko play-offeko finalaurrekoa lehiatuko dute bihar, etxetik kanpo, Oiartzunen aurka.
Joan den asteburuko partidarekin borobildu zuen Pari Berrik liga. 
IDK-Pari Berri areto futbol talde sanjuandarrak Gipuzkoako Lehen Ligan buru bukatu du, bigarrenekiko (Teep Tolosala) hamahiru puntuko aldearekin. Ospatzeko aste hau besterik ez dute izan, joan den asteburuan izan baitzuten ligako azken norgehiagoka, eta bihar bertan, ostiralarekin, buru-belarri hasiko baitira igoerarako play-offean onena ematen.
Gipuzkoa, Bizkai eta Arabako lau talde igoko dira, denera, Euskal Ligara. Haietako hiruk (herrialde bakoitzeko buruak) zuzenean lortuko dute igoera, eta laugarrena nor den bigarren play-off batean erabakiko da. Final hori hiru lurraldeetako bigarren taldeek jokatuko dute, lehia triangeluarrean, eta irabazten duena hiru onenekin batera igoko da Gipuzkoatik Euskal Ligara.
Pari Berrik, jokatutako 26 partidetatik 22 irabazi baditu ere, dena jokoan du oraindik ere. Izan ere, finalerdiak bihar bertan hasiko dituzte, eta lau talde onenen artean nagusitzen denak soilik izango baitu igoerarako txartela ziurtatuta. Gipuzkoako kasuan, lehenengoa (Pari Berri) laugarrenaren (Oiartzun) kontra lehiatu beharko da; eta bigarrena hirugarrenaren kontra (Teep Tolosala eta Eguzki Arkupe, hurrenez hurren).
Finalaurreko horietako bi irabazleek finala jokatuko dute gero. Bien arteko irabazlea zuzenean igoko da datorren denboraldian Euskal Ligan aritzeko, eta galtzaileak, aldiz, aukera berri bat izango du bigarren geldituriko talde arabar eta bizkaitarraren aurkako norgehiagoketan (triangeluar lehian) nagusitzen bada. Izan ere, horien artean onena ere igoko baita Euskal Ligara, Gipuzkoako, Arabako eta Bizkaiko irabazleekin batera.
Pari Berriren hitzordua: Bihar, ostirala, 20:20ean Elorsoro kiroldegian (Oiartzun). Zaleei bertaratzeko deia egin diete sanjuandarrek: “Zuen laguntza behar dugu!”.
