Gaztañoko jaiek ostiraleko egitaraua ezagutarazi dute
Jaiak ekainaren 17an hasiko dira ekintza ugarirekin: pailazoak, Maritxu Mozkorraren jaitsiera, kontzertuak edo afariak egongo dira lehen egunean.
Gaztañoko jaien kartela. Uda iristearekin batera, herriko eta auzoetako jaiak ere iritsiko dira Errenteria-Oreretara. Horietako batzuk izan dira dagoeneko, eta azken prestaketa lanekin dabiltzanak Gaztañokoak dira. Gaztañoko jaiak hasteko hilabete geratzen denean, egitaraua ezagutarazten ari dira gutxika, eta gustu guztietarako proposamenekin datoz. Jaiak ekainaren 17an, ostirala, hasiko dira arratsaldeko 18:00etan Porrotx eta Marimototx pailazo ezagunen emanaldiarekin. Saio hori Gaztañoko erabilera anitzeko gune berrian izango da. Pailazoen ondoren, Maritxu Mozkorraren jaitsierarekin eta buruhandiekin emango zaie hasiera auzoko jaiei.
19:30ean, Iratxo iturriaren irekiera egingo dute, eta 20:30ean, patata tortilla lehiaketa. 21:30ean afarien txanda izango da, eta gaztetxeko kideek parrillada antolatu dute gaztetxean. Sabelak beteta, kontzertuen unea izango da auzoko karpa nagusian. Unidad Alavesa, Sofokaos eta El Kinto Kontenedor taldeek gaua alaituko dute 22:30etik aurrera. Gaua, baina, ez da hor etengo, eta luzatu nahi dutenek DNG eta Unaiban DJ-ak izango dituzte gaztetxean.
