[Elkarrizketa] "Amets handia da mendeurrena Hirugarren Mailan egin ahal izatea"
Touringen mutilen talde nagusiak sasoi bikaina osatu du, eta igandean lortutako igoerarekin biribildu dute denboraldia. Klubaren presidenteak aitortu du «amets batean eta sinetsi ezinik» daudela.
![](https://oarsoaldea.hitza.eus/site/files/2022/05/asier-yerobi.png)
23 urteren ondoren, Hirugarren Mailarako igoera lortu duzue. Espero zenuten denboraldi hasieran hori lortzea? Igoera zen helburua?
Helburua ez zen mailaz igotzea, gure asmoa goiko postuetan egotea zen. Denboraldi hasieran fitxaketa batzuk egin genituen taldea indartzeko. Bagenekien talde ona genuela, eta sailkapeneko lehen bost postuetan egotea espero genuen, baina dena uste baino askoz hobeto joan da. Hasieratik goiko postuetan jarri ginen eta ez gara bigarren postutik jaitsi. Azken hilabeteetan puntu diferentzia handia izan dugu bigarrenarekiko, eta horrek gauzak erraztu dizkigu.
Igoera lortzeaz gain, egin duzuen denboraldia ikaragarria izan da.
Urte guztian izandako sentsazioak oso onak izan dira, arerioak oso ondo gainditu ditugu, eta bizpahiru partida kenduta, gainontzekoak oso onak izan dira.
Hirugarren Mailarako igoerak zer suposatzen du Errenteria-Orereta bezalako herri batentzat?
Igoera esanahi handikoa da, lortzea oso zaila baita. Egia da kalean beti esaten digutela Errenteria bezalako herri batek, 40.000 biztanlerekin, bertako futbol taldeak gutxienez Hirugarren Mailan egon beharko lukeela. Hori esatea erraza da, baina lortzeak zailtasunak ditu. Gainera, Errenteria toki estrategikoan kokatua dagoen herria da. Ondo komunikatua dago Donostia eta Bidasoarekin, eta oso erraza da jokalari on bat ateratzen zaizunean segituan Donostialdeko klub indartsuek fitxatzea. Orain Hirugarren Mailan lehiatuko gara, eta bertan mantentzen saiatuko gara.
Eta klubarentzat?
Asko suposatzen du. Datorren urtean ehun urte beteko ditugu, eta guretzat amets handia da mendeurrena Hirugarren Mailan ospatzea. Kluba hartu genuenean oso egoera larrian zegoen, Preferente Mailan, eta lau urtean bi igoera lortu ditugu. Taldea kategorian mantentzeko lan handia egingo dugu, ez dugu nahi igo eta datorren denboraldian jaitsi behar izatea. Talde sendo bat osatu nahi dugu Hirugarren Mailan mantentzeko. Horrek, gainera, aukera ematen du beheko kategoriek erreferente bat izateko, eta harrobiko jokalarientzat ispilua izan daiteke.
Mendeurrena Hirugarren Mailan ospatuko duzue. Berezia izango da klubarentzat, ezta?
Kluba hartu genuenean esango baligute Hirugarren Mailan egongo ginela, eta bigarren taldea Preferentera igotzeko lehian egongo zela, ez genuke sinetsiko, ez dakigu non sinatu beharko genukeen. Guk lehen taldea Preferenten hartu genuen, eta orain Hirugarren Mailara igo dugu. Futbol eskolan eta harrobian geroz eta jokalari gehiago dauzkagu eta geroz eta neska gehiago datoz gugana.
Igoera lortua izan arren, denboraldia ez da bukatu, eta bihar zaleekin ospatzeko aukera izango duzue.
Igoera herriarekin ospatu nahi dugu eta taldeari merezitako omenaldia eman nahi diogu. Harrera egingo digute udaletxean, eta nahi duguna da bihar herria festa bat izatea. Gipuzkoako Futbol Federazioko presidenteak txapeldunen kopa emango digu, eta merezi bezala ospatu nahi dugu.