[Galeria] Harrera egartsua egin diote Antxoberfesti
Juanjo Bujandari omenaldia, txaranga, kontzertua, SOS Antxo eta egarri handia. Antxoko garagardo festaren lehen jardunaldia joan da.
Juanjo Bujandaren omenaldia topa jendetsu batekin itxi zuten. 
Atzoko 20:00ak aldera zabaldu zituen Antxoberfesteko karpak ateak, eta eguratsak lagundu ez bazuen ere, garagardo-txorrotek ez zuten atseden hartzeko astirik izan, hamarnaka lagun hurbildu baitziren Antxoko garagardoaren festarekin gozatua hartzera.
Juanjo Bujanda omendu zuten lehenengo. Ezer gutxi esan behar izan zuten oholtzara igotakoek, bizilagunen txalo zaparrada amaigabeak hitzik gabe adierazi baitzuen zenbateraino zuen maite Antxok Bujanda. SOS Antxoko kideek hartu zuten gero hitza, biharko plangintza jendaurrean aurkezteko.
Pasai txarangak eta Nomguayazen kontzertuak girotu zuten barra, eta asko izan ziren Ibaiondo pilotalekuan afaltzera gelditu zirenak. Berandura arte, gainera! Osteguna izanik ere, ageriko egin baitzuten garagardoaren zaleek pandemiak utziriko egarria…
