Danel Castillo eta Ane Jaunarena, garaile Gazte Mailako Aurresku Txapelketa Nagusian
Castillo sanjuandarra Errenteria-Oreretan egin zen lehian izan zen irabazle atzo; Jaunarena lezoarra, berriz, larunbatean garaile Legazpin.
Danel Castillo eta June Osinalde izan ziren garaile Errenteria-Oreretan. Asteburuan egin dira Errenteria-Oreretan (atzo) eta Legazpin (larunbatean) gipuzkoar erako Gazte Mailako Aurresku Txapelketa Nagusiak. Errenteria-Oreretan, zehazki, B (2009tik 2011ra artean jaiotakoak) eta A sailetakoak (2012tik 2014ra artean jaiotakoak) egin dituzte; Legazpin, D sailekoa (2007 eta 2008 urteetan jaiotakoak). Bada hiru txapelketen artean, bi garaipen etorri dira Oarsoaldera: batetik, larunbatean, D sailekoan irabazle izan zen Ane Jaunarena lezoarra; bestetik, atzo (Errenteria-Oreretan), sari nagusia Danel Castillo sanjuandarrentzat izan zen A kategorian, eta Bn, berriz, June Osinalde legazpiarra irabazle.
Legazpiko larunbateko saioko partaideak, tartean Ane Jaunarena irabazlea dela. Argazkia: Goierriko Hitza.
Legazpiko saioan, Jaunarena lezoarrak Amaia Azpeitia legazpiarra eta Maddi Davila zizurkildarra izan zituen atzetik hurrenez hurren. Baina sari gehiago izan ziren: jantzirik onenarena Mikel Esnaola lezoarrak egin zuen bere, eta aldi berean, dantza irakasle onenaren garaikurra Leire Amiano lezoarrari eman zioten.
Errenteria-Oreretako atzoko saioa Erein elkarteak antolatu zuen. Haiek antolatutako 37.ena izan zen, formatu mistoan laugarrena. A sailean, Danel Castillo sanjuandarraren atzetik Jurgi Errandonea (Andoain) eta Onditz Esnaola (Lizartza) sailkatu ziren, laugarren Enara Artola lezoarra izan zelarik. B sailekoen artean, June Osinaldek bi legazpiar herrikide izan zituen atzetik, Araitz Berasategi eta Nora Eskudero. Maren Zaldua oiartzuarra izan zen laugarrena.
Segidan, Erein elkartekoek HITZAri emandako hainbat argazki:
