Bi artisautza proiektu hautatu ditu Berpiztu programak, horiek sustatzeko
Egitasmo horren baitan hamabost artisau trebatu dituzte. Maite Anton eta Jone Zubizarretaren proposamenak pasako dira hurrengo fasera.
Maite Anton Mugertza eta Jone Zubizarreta Unzetaren proiektuak pasako dira hurrengo fasera. 
Oarsoaldea Garapen Agentziak, Eusko Jaurlaritzak finantzatutako Berpiztu programaren baitan, hamabost artisauri prestakuntza sakona eman die azken asteotan. Horiek aurkezturikoen artean bi proiektu hautatu dituzte fase berrian sartzeko.
Proiektuak orientazioa eskaini die artisauei beren proiektuez hausnartu, eta indargune nahiz ahulguneak identifikatzeko. Lehen prestakuntza fasean hamabost lagunek parte hartu dute, eta haien bi proiektu hautatu dira bigarren fase batean sartzeko. Horiei arreta integral pertsonalizatua, 6.000 euroko laguntza, eta Habian! inkubagailuan 3 hilabeteko doako egonaldia emango diete.
Hautaturiko artisauak hauek izan dira: Maite Anton Mugertza, Txatxala proiektuarekin, (artisau moduan poltsak, koleteroak, turbanteak, etab. egiten ditu) eta Jone Zubizarreta Unzeta, bere JoneZZ proiektuarekin (zeramika eta bitxigintza uztartzen ditu, fokua aplikazio metalikoak dituzten ontzietan jarriz).
