Bidegorria birnaturalizatu eta aberasteko obrak bukatu dituzte
Lan horiek Agintaldi Planaren barruan aurreikusita zituen udalak, eta Fanderia auzoko autopista azpian geratzen den eremua berritu dute.
Aizpea Otaegi eta Javier Hurtado. Fanderia auzoko Oiartzun ibaiaren ertzetan azpiegitura multzo baten estalitako tarte baten hiriko ibai-korridorearen birnaturalizazio proiektuaren obrak bukatu dituzte, eta horien aurkezpena egin dute gaur goizean Aizpea Otaegi alkateak eta Javier Hurtado Eusko Jaurlaritzako Turismo, Merkataritza eta Kontsumo sailburuak.
Arditurriko bidegorria ondare eta natur baliabide garrantzitsua da Oarsoaldearentzat. Eskualdeko udalerrien bizikleta bidezko lotunea bermatzen du, eta udalerrien arteko bizikleta bidezko komunikazioa sustatzeaz gain, Errenteria-Oreretako eta Oarsoaldeko biztanleentzat arnasgune natural garrantzitsua da, aisialdirako eta kirolerako oso aproposa.
Obra horiek azken lau hilabeteetan osatu dituzte, eta 2019-2023 Agintaldirako Planean jaso zuten moduan, autopista azpian geratzen eremu hori berritu, birnaturalizatu eta aberastu da.
Lan horiek 320.000 euroko aurrekontua izan dute, eta Oarsoaldea Biziberritzeko Plan Estrategikoan jasotako jarduera-ardatzak garatzeko, Eusko Jaurlaritzak martxan jarritako Berpiztu programaren baitan Errenteriako Udalak jaso duen laguntzari esker gauzatu ahal izan du.
Honakoak dira proiektuaren helburuak:
- Arditurriko Bide Berdearen ingurumen- eta paisaia-kalitatea hobetzea, Errenteriako eremuan.
- Errenteria-Oiartzun eskualdeko bizikleta-bidea berrantolatzea.
- Ibilguaren eta zortasunaren eremuan biodibertsitatea, erriberako landaredia eta haltzadi kantauriarra berreskuratzea, ondoko eremuarekin jarraitutasuna emanez, uren kalitatea ahal den neurrian hobetuz eta higadura-prozesuak murriztuz.
- AP-1/AP-8 autobideko zubien eremua modu atseginagoan egokitzea, eta, aldi berean, tokiko natura- eta kultura-ondarea interpretatzea eta aurkitzea baimenduko duena.
- Berdeguneak eta horien eta mugakide diren hiriguneen arteko lotura hobetzea, bai eta ibaitik gertu egoteko eremuak sortzea ere, herritarren osasun fisiko eta mentalari dagokionez.
- Dauden materialetatik abiatzea, ibaitik gertu dagoen lengoaia berri bat emanez, eta eraispenetako edo lur-mugimenduetako material guztia berrerabiltzea eremuan bertan, hondakinik ez sortzeko.
Ordezkariak, pozik
Javier Hurtado Eusko Jaurlaritzako Turismo, Merkataritza eta Kontsumo sailburuak zehaztu du oso garrantzitsua dela “Eusko Jaurlaritzak udalerriei lehentasunezko jarduketa-eremuetan turismoa biziberritzeko proiektu zehatzetarako behar dituzten baliabideak emateko egin den apustua. Plan hori 2021ean onartu genuen, eta 6,7 milioi euroko zuzkidura du; horietatik, milioi bat Oarsoaldea eskualdera bideratu da. Gaur, Arditurri bide berdeak baliabide turistiko gisa duen balioa indartuko duten lanak egiaztatzera joan gaitezke. Erabat bukatutako lehenengo jarduera da, eta berriro hurbiltzen garen lehenengoa. Horregatik, benetan pozgarria da hemen egotea, eta ikustea Errenteriaren eta gainerako udalerrien ahaleginaren eta lanaren emaitzak eta Turismo, Merkataritza eta Kontsumo Sailarekin koordinazioa, eskertzen dudana”.
Horrez gain, Aizpea Otaegi alkateak nabarmendu du “oso pozik” daudela proiektua gauzatu dutelako: “Oso pozik gaude, proiektu hau ere jada gauzatu dugulako. Lanak bukatu zirela pare bat aste pasa dira eta dagoeneko herritar askok izan dute egin den esku hartzea ikusi eta gozatzeko aukera. Espero dut, guztion artean behar bezala zaintzea”.
