[Galeria] Touringek igoera herriarekin ospatu du
Festa Fanderiako zelaian hasi zen, eta txapeldunen kopa eskaini zieten zaleei. Bertatik, txaranga baten laguntzaz, udaletxera abiatu ziren.
Touringeko mutilak txapeldunen koparekin. Igoera aurreko asteburuan lortu bazuten ere, Touringeko mutilek larunbatean ospatu zuten Hirugarren Mailako igoera zaleekin eta herriarekin. Festa giroa nabarmena izan zen arratsaldetik. Emaitza gutxienekoa izan zen, baina denboraldiko etxeko azken partida ezin izan zuten aurrera atera, bana berdindu baitzuten. Norgehiagoka bukaeran Manu Diaz Gipuzkoako Futbol Federazioko presidenteak txapeldunen kopa eman zien jokalariei, eta merezitako igoera bertaratu zirenekin ospatzen hasi ziren. Horrez gain, mutilen bigarren taldea ere Preferente mailara igo zen larunbatean, eta haien igoera ere ospatu zuten Fanderian.
Aldageletatik atera zirenean, txaranga batez lagunduta, jokalari eta zaleek kalejira bat egin zuten Fanderiako futbol zelaitik udaletxera, bertan harrera egin baitzieten. Herriko plaza jendez lepo, jokalariak eta klubeko ordezkariak udaletxeko balkoira atera ziren ospatzera. Udaletxean Errenteriako Udaleko alderdi politiko guztiek egin zieten harrera, Aizpea Otaegi alkatea eta Maite Gartzia Kirol zinegotzia buru zirela.
Argazki galeria: Karrera.
