Merkatari, ostalari eta zerbitzuen aldeko neurriak proposatu ditu EH Bilduk
Sektoreen egoera larria dela iritzita, neurri sorta proposatu du koalizioak. Laurak Bat eta euskara jarri dituzte ardatz, besteak beste.
Iraitz Pazos eta Mikel Garcia bilkideak, Pasai Antxoko Hamarretxeta kalean. 
2022ko aurrekontuen eztabaidan hainbat neurri zehatz hartzea proposatu zion oposizioko EH Bilduk Pasaiako udal gobernuari. Horien artean, une honetan indarrean dagoen kontsumo-bonuen kanpaina (zeinarentzat 50.000 euroko funtsa hitzartu baitzuten) eta bertako merkataritza, ostalaritza eta zerbitzuak sustatzeko 200.000 euroko “talka-plana” izendatu dutena proposatu zuten. Bigarrena hori PSE-EEk eta EAJk atzera bota zuten.
Testuinguru horretan, sektoreek azken aldian asko sufritu dutela iritzita, bilkideek neurri sorta bat prestatu dute, “egoera larri honi erantzutea presazko xedea delako”. Horien artean, honakoak jo dituzte bereziki funtsezkotzat: Laurak Bat elkartea indartzea eta akonpainatzea, talka-plana garatzea, kontsumo ohituren paradigma berrira egokitzea, eta euskara sustatzea.
Bertako merkataritza, ostalaritza eta zerbitzuek 2008. urtetik hona zekartzaten gainbehera azkartu dela esan, eta datuetara jo du koalizio abertzaleak horren erakusle: Eustaten arabera %35 gutxitu da Pasaian bertako merkataritzaren eta zerbitzuen eskaintza 2008-2019 tartean, eta %15 inguru ostalaritza establezimenduena. Bestera esanda, 211tik 137ra igaro da merkataritza denda eta zerbitzuen kopurua, eta 109tik 93ra ostalaritzarekin lotutako establezimendu kopurua.
Egoera “larria eta onartezina” da EH Bilduren iritziz, eta horren neurriko politika publikoak sustatu behar ditu bertoko gobernuak datozen urteotan. “Datuak aztertu besterik ez dago ikusteko azken urteotan hartu diren neurriek (hartu diren kasuetan) ez dutela nahikoa eragina izan eta oso hankamotz gelditu direla”.
