Pasaiako udal taldeek ez dute bat egin LGTBIfobiaren adierazpenean
PSE-EE, EAJ eta Ahal Duguk bat egin dute LGTBIfobiaren Aurkako Egunaren harira. EH Bilduk testua ez sinatzeko arrazoiak azaldu ditu.
Lore Suarez (PSE-EE) eta Mikel Garcia (EH Bildu), udalbatzar batean. Alderdiek ez dute bat egin LGTBIfobiaren kontrako adierazpenean. 
Gaur, maiatzak 17, LGTBIfobiaren Aurkako Nazioarteko Eguna da, egun horretan ezabatu zuelako Osasunerako Mundu Erakundeak 1990. urtean homosexualitatea buruko gaixotasunen zerrendatik.
Testuinguru horretan, Pasaiako EAJ, PSE-EE eta Ahal Dugu udal taldeek adierazpen bateratua egin dute, “Pasaia inklusibo eta askotarikoa” aldarrikatu asmoz. EH Bilduk, ordea, dokumentu hori ez sinatzea erabaki du, eta zergatiak azaldu ditu Iraitz Pazosek.
Udal talde sinatzaileek konpromiso hauek hartu dituzte:
- Pasaiako gazteentzako sexualitateari eta generoari buruzko Goxatu aholkularitza zerbitzua bultzatzen jarraitzea.
- Herriko ikastetxeetan kontzientziazio, ikusgaitasun eta sentsibilizazio programak proposatzea.
- Eraso LGTBIfobiko bat dagoen aldiro, udal talde sinatzaileek gaitzespen irmoa adierazi eta erantzun instituzional bateratua bultzatzea.
- Hizkuntzaren erabilera inklusiboa sustatzea.
- Herritarren sentsibilizazioan sakontzea, gizartea kontzientziatzeko kanpainak eta programak sustatuz.
Adierazpena gaitzetsi dute bilkideek
Adierazpen horren alde agertu ez den udalbatzako alderdi bakarra EH Bildu izan da, eta Iraitz Pazos kideak azaldu ditu horren arrazoiak: “Ortzadar koloreko zebrabideak ezabatu dituen gobernu batek ezin du orain testu bat sinatu kolektibo honen ikusgarritasuna aldarrikatuz”. Hipokritatzat jo dute ekintza oposiziokoek.
Testuan moldaketa bat eginez udalak kolektiboari publikoki barkamena eskatzea proposatu zuen koalizio abertzaleak. Horrekin batera, udal taldeei eskatu zien konpromisoa hartzeko zuritutako pasabide horiei kolorea bueltatzen saiatzeko. Udal gobernuak, baina, ez zuen proposamen hori onetsi.
Justifikaziorik ez diote ikusi bilkideek erabakiari: “Betiko berdina da. Egoera txarrean dauden zebrabideak daude, eta baita beste kolore batekoak (gorriak) ere, eta horietan ez da planteatu inolako interbentziorik, bakarrik LGTBI+ horietan”. Uste dute udal gobernuak kolektiboari eraso egin ziola erabaki horrekin.
