Jarduera ugarirekin dator VII. 'Errenterian 11 kolore' programa
Kultur Aniztasuna aldarrikatzen eta aberastasuna azpimarratzen duen programa martxan dago jada, eta igandean emango zaio bukaera.
'Errenterian 11 kolore' programan parte hartuko duten antolatzaile eta ordezkariak. Kultur Aniztasunaren Nazioarteko Eguna maiatzaren 21ean izango da, eta ospakizun horren harira, programa zabala antolatu dute aste honetan Errenteria-Oreretan publiko guztietarako. Kultur aniztasunaren balio positiboa aldarrikatzeko eta aberastasuna azpimarratzeko, kolorez jantziko da herria datozen egunotan, eta gaur aurkeztu dute ‘Errenterian 11 kolore’ programaren VII. edizioa Lehendakari Agirre plazan Jose Ramon Gurrutxaga Kultura Aniztasunaren, Giza Eskubideen eta Garapenerako Lankidetzaren zinegotziak, Samira Goddi eta Ainara Sanz Kultura Aniztasunaren, Giza Eskubideen eta Garapenerako Lankidetzaren teknikariek, Maika Martin Errenkoalderen lehendakariak, proiektuan parte hartzen duten ostalarien ordezkariek, Freytter Elkarteko kideek eta Helduen Hezkuntzako arduradunek.
Programa martxan da, atzo egin baitzen zenbait GKGE-etako ordezkariekin solasaldi bat Reina Aretoan, egun hainbat herrialdetan dituzten proiektu eta egoeraren inguruan. Horrez gain, Beraungo dendetako erakusleihoetan, Helduen Hezkuntzako ikasleek aurreko urtean egindako argazkiak dituzte ikusgai larunbatetik.
Programaren xehetasunak
‘Errenterian 11 kolore’ programako ekintza eta jarduerak ostegunetik, hilak 19, igandera, hilak 22, izango dira. Ostegunetik igandera, ’11 zapore’ egitasmoaren baitan, herriko erdiguneko 25 tabernak munduko beste herrialderen batean oinarritutako pintxo edo edariak izango dituzte salgai.
Jarduerek ostiralean, hilak 20, izango dute jarraipena, 20:00etan, Lekuona Fabrikan. Freytter Elkarteak antolatuta, hamar emakume etorkinek elkarrekin egindako hausnarketa plazaratuko dute, eta kultura aniztasuna, gizarteratzea eta migrazio esperientziak izango dituzte hizpide. Gainera, hilaren 28tik 31era, emakume migratzaile horien irudien eta bizipenen ikus-entzunezko erakusketa bat egongo da Lekuona Fabrikan.
Igandean, hilak 22, emango zaio bukaera programari Burubeltz Konpartsak antolatu duen kalejirarekin. Helburua da programa festa giro koloretsuan ixtea, eta kalejira hori herriko kaleetan murgilduko da. Irteera Alabergako plazatik izango da 12:00etan, eta Zumardian bukatuko da. Egun horretan danborrak eta puzgarriak egongo dira, eta koloretako kartelak banatuko dira. Udalak bertaratzera animatu ditu herritarrak.
