600 gazte baino gehiagok hartuko dute parte larunbateko triatloi eskolan
Oarsotri Triatloi Klubak antolatu ditu larunbateko jardunaldi horiek. Trafikoan eragina izango du probak, eta Fanderiako igerilekua eta hidroterapia gunea itxita egongo dira.
Oarsotriko kideak. Larunbatean, hilak 28, triatloi eskola jardunaldiak egingo dituzte Errenteria-Oreretan Oarsotri Triatloi Klubak antolatuta, Errenteriako Udalaren laguntzarekin. Jardunaldi horietan, Oarsoaldeko ikastetxeetako 600 gaztek baino gehiagok hartuko dute parte.
Parte hartzaileek korrika, igerian eta bizikletan duten trebezia erakutsi beharko dute. Proba horretan, 50 metro igerian, 1.400 metro bizikletan eta 650 metro korrika egin beharko dituzte. Proba horietarako, parte hartzaileek beharrezkoa duten materiala eta ekipamendua eraman beharko dute. Igeriketarako txankletak, txanoa, bainujantzia eta betaurrekoak beharko dira. Bizikleta probarako kaskoa, kamiseta, zapatilak eta bizikleta eraman beharko dira. Eta, lasterkan aritzeko, kamiseta eta zapatilak beharko dituzte parte hartzaileek.
Igeriketa probak Fanderiako igerilekuan egingo dira; korrikako proba bidegorrian gauzatuko da; eta txirrindularitza, berriz, Touring eta Fanderia etorbideen arteko hiri zirkuituan egingo da, Fanderiako igerilekuko biribilgunearen eta Fanderiako futbol zelaiaren sarrera nagusiaren artean. Norabide bakoitzeko zirkuitua izango da. Probaren irteera eta helmuga Fanderiako igerilekuaren parean egingo dira, zirkuituaren erdiko gunean. Trantsizio gunea, hau da, kirolariek ekipamendua aldatzeko erabiliko duten lekua, Fanderiako igerilekuaren soropilean kokatuko da.
Triatloiak, ohikoa den bezala, bi trantsizio izango ditu: igeriketatik txirrindularitzara, eta txirrindularitzatik korrika egitera. Aldaketa horietan, parte hartzaileek modalitate bakoitzerako ekipamendua jarri eta kendu beharko dute modu egoki eta seguruan.
Larunbateko jardunaldian, Oarsotri taldeko boluntarioek laguntza emango dute. OTXE elkarteak ere laguntza eskainiko du bizikletaren mekanikarekin zerikusia duten aspektuetan. Erabiliko den zirkuitua itxita egongo da erabat eta hesiak jarriko dira jendea sar ez dadin. Horrez gain, Fanderiako pilotalekua prestatuko da kontsigna gisa.
Trafikoa moztuko da
Zirkuitua trafikoarentzako itxita egongo da larunbateko 07:30etik 15:00etara. Gainera, zirkuituaren seinalizatutako eremuetan ezin izango dira ibilgailuak aparkatu ostiraleko 22:00etatik larunbateko 15:00etara.
Parte hartzaileei edo Fanderiako kirolgunera hurbildu nahi duten pertsonei bizikletaz edo oinez bertaratzeko gomendioa luzatu die udalak, Fanderiako kaleak trafikoarentzat moztuta egongo baitira.
Igerilekua itxita
Lehiaketa dela eta, Fanderiako igerilekua eta hidroterapia gunea larunbatean itxita egongo dira 09:00etatik 14:00etara. Instalazioko gainerako guneak irekita egongo dira ohiko ordutegian. Horrez gain, nahi duten erabiltzaileek Galtzarabordako kiroldegia erabil dezakete, eta igeriketako haurrentzako ikastaroak Galtzarabordara lekualdatu dira.
Errenteriako Udalak ulermena eskatu nahi izan die kirol jardueraren garapenak modu batera edo bestera eragin diezaiekeen pertsona guztiei.
