Etorkizuna Eraikiz, Lezon
Gipuzkoari buruz herritarrek dituzten ekarpenak jasotzeko kapsula jarri dute Gurutze Santuaren plazan. 19:00ak arte da zabalik.
Etorkizuna Eraikiz Gipuzkoako Foru Aldundiaren egitasmo interaktiboa Lezon izango da gaur. Kapsula antzekoa jarri dute Gurutze Santuaren plazan. Foru erakundearen iniziatibaren xedea da herritarrek Gipuzkoaren etorkizunari begira dituzten ekarpenak jasotzea “Gipuzkoarrak dira lurraldearen etorkizun, horregatik, haiekin elkarlana eraiki behar dugu. Denon artean amesten dugun lurraldea eraikitzen saiatu behar gara”, adierazi du Eider Mendoza Gobernantza diputatuak gaur egindako aurkezpenean. Harekin Jesus Mari Martiarena alkatea izan da. Herritarrek politikarekiko eta erakundeekiko “konfiantza berreskuratzeko” haien partaidetza funtsezkotzat du aldundiak.
Kapsula goizean jarri dute, eta gaurko 19:00etara arte izango da zabalik herritarren ekarpenen zain. Han, Gipuzkoari buruzko hainbat argibide ikus ditzakete bisitariek. Baita bi aldeko konpromisoa eskatu ere: 2040an Gipuzkoa nolakoa nahiko lukete esan dezakete herritarrek, eta horri lotuta, haien konpromisoa zer-nolakoa izan daitekeen eskatuko diete. “Dinamika horren helburua da herritarrak gogoeta egitera eta lurraldearen etorkizunarekin konprometitzera bultzatzea”.
Martiarena alkateak gustura jaso du aldundiaren iniziatiba. Gogoeta kolektibo horretan parte hartzea baikor baloratu du, eta nabarmendu du oro har herritar guztiei zuzendutako egitasmoa bada ere, gazteen ekarpena ere garrantzitsua izango dela. “Lezoarrak ekimen honetan oarte hartzera, kapsula bisitatzera eta proposamenak egitera gonbidatu nahi ditugu.Guztion laguntza behar dugu Gipuzkoak aurrera egin dezan”.
