Gaztañoko festa bukaerek egitaraua dute jada
Jai batzordeko kideek ezagutarazi dituzte dagoeneko igandeko, ekainak 19, eta San Juan bezperako, ekainak 23, programazioa.
San Juan bezperako ikuskizuna. Gaztañoko jai batzordeko kideak gutxika ezagutarazten ari dira aurtengo jaietako programazioa, eta azken bi egunetako egitaraua aurkeztu berri dute. Igandean, ekainak 19, toka eta bote txapelketa antolatu dira 12:00etan. Ondoren, 14:00etan, auzoko gazte izandakoei merezitako bazkaria eskainiko zaie Bukagaitz elkartean. Sabelak beteta, arratsaldeko 17:00etan apar festa eta ur jolasak antolatu dituzte jai batzordeko kideek. Horrez gain, azaldu dute auzoko aldapetan ur txirrista bat egongo dela, eta auzotarrei bainujantzia eta txankletak prestatzeko eskatu diete. Igandeko ospakizunekin bukatzeko, 18:30ean, auzoko lokaleko kanpoaldean, Gaztañotik mundura eta mundutik Gaztañora jaia egingo dute. Azken ospakizun horretan, musika, dantza, janaria eta edariak egongo direla iragarri dute auzoko kideek.
Gainera, ekainaren 23ko, osteguna, programa ere ezagutarazi dute jai batzordeko kideek. San Juan bezperaren suaren gaua berezia izan ohi da Gaztaño auzoan, eta horren baitako egitaraua eraiki dute. 17:00etan haurrentzako herri kirolak egongo dira auzoko karpa nagusian. Arratsaldean zehar, txorizoa edo saiheskia izango dituzte, sagardoaren laguntzaz afari merienda bat osatzeko. Azkenik, iluntzean, ikuskizunarekin batera sua piztuko da. Gau hori modu berezian ospatzeko, bideo emanaldia eta su artifizialak egongo dira. Horrez gain, sua pizteko, beste auzo edo herrietatik egurra eramateko deia luzatu dute Gaztaño auzotik.
