San Pedroko Inude eta Artzain gazteak entseatzen hasiko dira larunbatean
San Pedro egunean bertan egingo dute 3 urtetik gorako haurrek euren agerraldia. Entseguak deitu dituzte datozen hiru larunbatetarako.
San Pedroko haurren Inude eta Artzainen desfilea; artxiboko irudia. 
Geroz eta gertuago dituzte sanpedrotarrek euren barrutiko jaiak, eta martxan jarriak dira horiek prestatzen. Inude eta artzainen desfilean haur naiz helduek parte hartuko dute; 3 urtetik aurrerako txikiek San Pedro egunean (ekainak 29) egingo dute erakustaldia, eta helduen konpartsa mozorrotuak, aldiz, uztailaren lehen igandearekin (3a) hartuko du barrutia.
Testuinguru horretan, ezinbestekoa aurretik entseatzea. Horretarako haurren hitzorduak datozen hiru larunbatetan finkatu dituzte: ekainaren 4, 11, eta 18an, hain zuzen ere. Hiru egun horietan 10:00etan elkartuko dira parte hartzaileak, frontoian.
Bikoteak 4ean antolatuko dituzte, eta egun horretan emango dute aukera, halaber, izen emate berriak egiteko nahiz pertsonaien jantziak jasotzeko (azken hori, 11:30etik 12:00ak arte, Herriko Plazan).
