Musikaldiak Trintxerpe eta San Pedron ospatuko ditu zilarrezko ezteiak
25 urte beteko ditu aurten Euskal Herriko Musika Eskolen jaiak. Ospatzeko, EAEko eskolatako 2.400dik gora ikaslek musikaz blaituko dute badia.
2022ko Euskal Herriko Trikitilari Eguneko irudi hau errepikatuko da Trintxerpen larunbatean. 
Musikaldiak, Euskal Herriko Musika Eskolen jaiak, mende laurdena beteko du aurten, eta urtemuga ospatzeko hastapenetara bueltatzea erabaki dute antolatzaileek: lehendabiziko jaialdian bezala, Pasaian egingo da aurten ere musikaren festa handia, eta Pasaia Musikali egokitu zaio antolakuntzaren buru izatea.
Ez da kasualitatea Illunbe Musika Elkartearen 50. urteurrena izatea justu aurten; eragileari aitortza egiteko modua ere izango da Musikaldia.
Gipuzkoa, Araba eta Bizkaiko 50 eskolatako ikasle eta irakasleek “musika elkarrekin egingo dute” datorren larunbatean Trintxerpe eta San Pedroko kaleetan barrena. 2.467 musikari arituko dira, guztira, Pasaian, gonbidatutako talde profesional batekin batera. Honako multzoetan elkartuko dira artistak:
- 388 lagun, trikiti eta pandero jotzaileen kalejira handi batean.
- 650etik gora ahotseko abesbatza.
- 300 musikarik osaturiko banda.
- 180 txistulariren alardea.
- Ia 200 kideko orkestra sinfonikoa.
- 100 laguneko akordeoi orkestra.
- 90 gitarrako talde bat.
- Piano, ganbera eta perkusioarekin arituko diren 85 partaide.
- Badiako ontzi batetik arituko diren 30 albokari, dultzainero eta gaitero.
- 130 laguneko konbo handi bat.
- Hainbat estilotako 310 dantza ikasle.
Esan bezala, datorren larunbatean, hilak 4, hartuko du lur Musikaldiak udalerrian. Zehazki, 09:45ean emango diote jaiari hasiera, Trintxerpeko Gernika plazan; bertan egingo dute inaugurazio ekitaldia eta, hori bukatuta, Pasaia Musikal eskolako musikariek Josu Elberdin sanpedrotarrak konposaturiko abestia joko dute.
Egunean zehar herriko zenbait gune musikaz bete ondoren, jaialdiari bukaera emango dio Rockalean taldeak Euskadi etorbidean. Bertan arituko dira 16:30etik 18:30era. “Egonezinik itxaroten zaituztegu”, egin dute gonbidapena antolatzaileek, “musikaren egun handia izango da!”. Horra hor programa zehatza:
- Egitaraua
09:00. Parte hartzaileak iritsiko dira.
09:45. Trintxerpeko Euskadi etorbideko oholtzan, aurkezpen ekitaldia.
10:45. Albokari, gaitero eta dultzaineroen itsas kalejira badiatik, Trintxerpeko ontziralekutik abiatuta.
10:45. Trintxerpeko Serafin Esnaola plazan, perkusio gunea.
11:00. Trintxerpeko Gudarien Plazatik, trikitilari eta pandero joleen kalejira.
11:00. Trintxerpeko Gernika plazako oholtzan, dantza taldeen emanaldiak.
11:15. Trintxerpeko Aranederreko pistetan, orkestra sinfonikoa.
11:30. San Pedroko elizako gunean, gitarra gunea.
12:00. Trintxerpeko Serafin Esnaola plazan, txistularien alardea.
12:00. San Pedroko Udal Aretoko eremuan, ganbera eta piano gunea.
12:45. Trintxerpeko Aranederreko pistetan, musika banda.
13:15. San Pedroko lonjako plazan, abesbatza.
13:30. Trintxerpeko Serafin Esnaola plazan, akordeoi orkestra.
14:00. Trintxerpeko Euskadi etorbideko karpan, konboa.
16:30-18:30. Trintxerpeko Euskadi etorbidean, Rockalean.
