Eskolako Agenda 2030eko lanketa aurkeztu diote ikasleek alkateari
15. Garapen Jasangarrien Helburuekin bat eginez, larreak, zelaiak eta landare itsutasuna izan dute aztergai oraingoan.
Ikasleak eta udal ordezkariak, pleno aretoan. Asteartean, Eskolako Agenda 2030 programan parte hartzen duten Errenteria-Oreretako ikastetxeetako ikasle, irakasle eta ordezkariak udaletxeko pleno aretoan bildu ziren Aizpea Otaegi alkateari proiektuaren baitan egindako lanketaren diagnostikoa aurkezteko eta beraien konpromisoak eta proposamenak helarazteko. Programan parte hartu duten zortzi ikastetxeak Bizarain LHI, Cristobal Gamon LHI, Don Bosco LHI, Egiluze Ikastetxea, Koldo Mitxelena BHI, Orereta Ikastola eta Telleri Alde Ikastetxea dira.
Ikasleek aurten 15. Garapen Jasangarrien Helburuarekin jarraitu dute, eta oraingoan, larreak, zelaiak eta landare itsutasunaren inguruko azterketa egin dute.
Ikasleek ateratako ondorioen arabera, ohartu dira landareen artean itsu gaudela, oharkabean pasatzen baikara haien ondotik. Ikasleek diote belarra oso maiz mozten delako izan daitekeela eta landareei loratzeko nahiko denborarik uzten ez zaielako. Horren harira, ikastetxean bertan edo handik gertu duten belardi zati bat hesitu eta loreak hazten utzi dituzte, ondoren loratutako espezieak ezagutu eta aztertzeko.
Horrez gain, baserrietara ere hainbat bisita egin dituzte, baserritarrentzat zelaiak eta belarrak duten garrantziaz jabetzeko. Gainera, Gipuzkoako beste 50 ikastetxerekin batera, Txikipedia osatzeko Loratu Sarea proiektuan aritu dira. Ikasle guztien artean landareen fitxak egin eta sarera igo dituzte, eta argazki horietako asko udaletxeko pleno aretoan ezarri zituzten asteartean.
Honakoak dira ikasleek hartutako konpromisoak:
- Gure inguruarekin egunerokoan errespetuz gozatzen ikasiko dugu.
- Ez ditugu zelaiak zikinduko eta gure hondakinak dagokion edukiontzian utziko ditugu.
- Arreta handiagoa jarriko dugu naturan.
- Intsektu eta antzeko animalia txikiak bakean utziko ditugu eta beraien bizitokia zainduko dugu.
- Gure inguruko landareak ezagutzen eta identifikatzen saiatuko gara.
- Zelaietako landareak ez ditugu moztuko.
- Ingurune naturalean lasai ibiliko gara zaratarik egin gabe.
- Ikaitakoa gure ingurukoan artean zabalduko dugu.
- Herrian antolatzen diren zuhaitz eta lore landaketetan parte hartuko dugu.
- Baserritarren lana hobeto baloratuko dugu.
Hartutako konpromisoez gain, ikasleek ere proposamenak egin dizkiote udalari. Ikasleek identifikatu dute landareen informazio eza dagoela, eta horren aurrean, baliabide ezberdinak martxan jartzea eskatu dute: panelak, tailerrak, erronkak sare sozialetan, Wordl jokoa edota ibilbide antolatuak eta gidatuak.
Horrez gain, herri barruko belazeak zaintzea nahi dute, eta eraikuntzaren bat egiten denean, inguruan berdeguneak jartzeko beharra azaldu dute. Eta zuhaitzen bat kendu behar izanez gero, beste nonbait landatzerik ba ote dagoen pentsatzea eskatu dute.
Denbora horretan aztertu dituzten parajeetan zaborra topatu dutenez, herri mailan garbiketa jardueran antolatzea ere eskatu diote alkateari, eta zorrotzagoak izatea nahiko lukete arauak errespetatzen ez dituztenekin. Azkenik, baserritarrek dituzten zailtasunetan jabetuz, beraien bizimodua mantentzen laguntzeko ahaleginak egin behar direla aipatu dute, hala nola, baserrietara daramaten bideak txukun mantentzea edota bertako produktuak kontsumitzea sustatzea.
Aizpea Otaegi alkateak egindako lana eta ekarpen guztiengatik eskerrak eman zizkien ikasleei, eta alkateak kontuan izango dituztela esan zien.
