Madalenetako omenduak ezagutarazi ditu udalbatzak
Errenteriako udalbatzarrak beste hainbat gai eztabaidatu zituen, horien artean interesa gehien piztu zuena gerakinaren erabilerarena izan zen.
Errenteriako udalbatzarra, pleno-aretoan. Errenteriako udalbatzarra asteartean bildu zen, beste hainbat gairen artean, gerakinari buruz eztabaidatzeko. Bide batez, aurtengo Madalen Jaietako omenduen izenak publiko egin zituzten.
Udalbatzarrak ia ordubeteko iraupena izan zuen, eta hasieran hainbat kontuen berri eman zuen udal gobernuak. Eztabaida mamitsuena zazpigarren puntuan eman zen, udal gobernuak kredituen gehikuntzaren proposamena egin zuenean. Udal gobernuaren izenean Garazi Lopez De Etxezarretak hartu zuen hitza, eta kredituen gehikuntza egiteko beharra defendatu zuen. Oposizioak ez zuen begi onez ikusi udal gobernuaren proposamena.
EAJko bozeramalea den Eli Muruak bere taldearen abstentzioa defendatu zuen bi arrazoi aipatuz. Batetik, gerakineko dirua proiektu berrietara bideratu behar dela uste du talde jeltzaleak. Ildo beretik, 2022ko aurrekontua orain dela soilik bost hilabete onartu zuela gogorarazi zuen Muruak, eta bere esanetan “partiden doikuntzetarako gerakineko dirua erabiltzea gobernu taldearen kudeaketa traketsaren seinale” dela azpimarratu zuen.
PSE-EE, bere aldetik, kritiko agertu zen proposamenarekin. Lehendabizi, udal gobernuaren formak salatu zituen Isaac Palencia PSE-EEko bozeramaleak: “Ez zaigu entregatzen aldez aurretik proposamena ekarpenak egin ahal izateko. Hori gutxi izango balitz, udalbatzarra egin baino ordu batzuk lehenago jasotzen dugu e-mail bat non esaten zaigu ekarpenak ez dituztela onartu”. Ondoren, EAJk erabilitako antzeko argudioa erabili zuen bozeramale sozialistak: “Aurrekontua egiterakoan zerbait egin zuten gaizki orain gerakina erabili behar bada oinarrizko partidak handitzeko”. Sozialistek proposamenaren aurka bozkatu zuten.
Udalbatzarra amaitzeko aurtengo Madalenetako omenduen izenak jakinarazi zituzten. Aurtengo omenduak Ekintza BIBE eta Arrats elkarteak dira. Lehenengoek ludopatia arazoak dituzten pertsonei laguntza ematen diete; bigarrenek, aldiz, bazterketa eta gizarte-zaurgarritasuneko egoeratan bizi diren lagunei babesa ematen diete.
