Papineko Gazteria, Antxoko gazte mugimendu berria
Hainbat kuadrillek bat egin dute Antxon espazio berriak sortu eta gazteen aisia eskaintza aberasteko. Jaietako egitaraua prestatzen ari dira.
Gazte talde berri bat sortu da Pasai Antxon, eta euren burua aurkeztu dute: “Papineko Gazteria deitu dugun mugimendu honen baitan herriko hainbat kuadrilletako gaztek bat egin dugu Antxok betidanik izan duen gazte mugimendua indartzeko asmoz”.
Azken urteotan, eta pandemiak egoera hori muturrera eraman duelarik, gazteei eskaini izan zaizkien aisialdirako aukerak urriak izan direla uste dute. “Gure espazioak lokal eta tabernetara mugatu dira”. Testuinguru horretan, barrutiko beste eragileekin bat eginda, indarrak elkartu eta espazio berriak sortu nahi dituzte, “herritik, herrian eta herriko gazteontzat”.
San Ferminetako egitaraua
Asmo horiei hasiera emateko aukera hobeezina dute ate-joka: Antxoko San Ferminak. 2022ko jaiak probestuko dituzte, txikitik eta autofinantzatuta, zenbait jarduera antolatzeko. Besteak beste, martxan da dagoeneko pala txapelketa, eta jaiek iraun artean grafiti tailerra, kontzertuak edota gazte olinpiadak antolatuko dituzte.
“Talde bezala gure lehen urtea denez, xumetik joko dugu eta lortutako horrekin urtean zehar beste motatako ekintzak antolatu nahiko genituzke. Herriak ematen diguna, herriari bueltatu”, azaldu dute. Dagoeneko harremanetan dira udal arduradunekin, eta haien laguntzaz karpa nahiz txosna berri bat edukiko dituzte antxotarrek aurtengo jaietan Ibaiondoko zabalgunean.
“Sortze prozesuan den mugimendu honek forma anitz har ditzake. Papineko Gazteriaren hastapenak besterik ez dira hauek, eta indarrak batu nahi dituen antxotar orori ateak zabalik dituela jakinarazi nahi diogu! Jarrai dezagun gogo eta grina honetatik saretzen, bat egiten eta sortzen”.
