Landarbaso Abesbatza indartsu dator kurtso bukaerara
Ekitaldiak gaur hasiko dira 17:45ean, Merkatuzarren antolatu duten haurren kontzertuarekin. Horrez gain, matrikulazio epea zabalik da jada.
Iñaki Tolaretxipi eta Maddalen Dorronsoro Merkatuzarren. Uda gainean da, eta uda iristearekin batera, ikastetxe, elkarte edota eragile ezberdinak kurtso bukaera antolatzen ari dira. Gogor lanean ari den eragileetako bat Landarbaso Abesbatza da, eta horretarako zenbait jarduera antolatu dituzte datozen egunetarako. Gaur goizean eman dute horien berri Iñaki Tolaretxipi zuzendariak eta Maddalen Dorronsoro talde formatiboko zuzendariak Merkatuzarren eginiko agerraldian.
Horietako lehena gaur izango da. Abesbatzak ‘Artista Piraten festa’ kontzertua antolatu du gaur, 17:45ean, Merkatuzarren. 6 eta 8 urte bitarteko haurrak izango dira protagonistak, MusikART Landarbaso taldea osatzen dutenek. Haur horiek sentsibilizazio saioetan murgildu dira, eta jarduera eta jolas musikal ezberdinen bitartez munduari bira eman diote, marinelek bezala. Haurrak, baina, ez dira marinel bihurtuko, pirata baizik, eta itsasoan zehar murgilduko den bidaia musikala antolatu dute. Egindako lana eta bizitako abenturak familiakoei erakutsi ahal izango dizkiete ikasle gazteek.
Kontari Landarbaso, Madrilen
Ikasturtea bukatzeko, Kontari Landarbasoko kideak Madrilera joango dira hilaren 18an. Bertan, Coro de Jovenes de Madrid abesbatzarekin batera, ‘Menudos Cantantes’ izeneko elkartruke kontzertua eskainiko du abesbatzak. Madrilgo koruak hasiko du kontzertu hori pare bat abesti interpretatuz. Ondoren, baina, Landarbasoko kideek egingo dute kontzertu osoa. Kontzertu hori prestatzeko, Adunan egongo dira asteburu honetan entseatzen.
Matrikula epea, irekita
Aurtengoa datozen egunetan itxiko bada ere, Landarbasoko kideak datorren ikasturtea antolatzen hasi dira dagoeneko. Bertaratzen direnek, abesten ikasi, gorputz adierazpena landu, istorioak kantatuz kontatu, gazte talde baten parte izan eta proiektu berritzaileez gozatzeko aukera izango dute. Matrikulazio epea zabalik dago jada, eta Landarbaso Abesbatzaren webgunean ahalbidetu duten formulario baten bidez egin behar da.
