[Bideoa eta argazki galeria] 989 egun geroago festak Lezon: Zabarre eta Maria Labaien iritsi dira
Arratsaldean hasi dira Lezoko Mendekoste Jaiak, Zabarre pirataren eta Maria Labaien sagardo egilearen etorrerarekin.
Lezoko festetako azken egun ofiziala 2019ko irailaren 15ekoa izan zen, 2019ko Santakrutz Jaietako azken egunekoa, alegia. 989 egun geroago (1.088 egun 2019ko mendekosteetako azken egunetik), festak itzuli dira herrira: hasi dira 2022ko mendekosteak. Gaurko 18:00ak inguruan iritsi dira badiatik Lezoko kaira Zabarre pirata eta Maria Labaien sagardogilea. Pirata Txikiak eta herritar asko zituzten zain han. Zabarreren lagun piratek eta Perutxoren jarraitzaileek liskarren bat izan dute, baina piratek berehala esan diete haiek ez direla jaietako protagonistak. Momentuz, lasai dago haien arteko giroa.
Bi urtez mendekosteetan ezin izan dute egon biek ez direlako egin. Hala, abentura eta pasadizo berri mordoska dituzte kontatzeko, urrun izan diren bitartean pilatutakoak. Birus malapartatuak kendutakoa berreskuratzen hasteko unea da, eman ez diren besarkadak, eremu formaletan egin ez diren elkarrizketak, aske dantza egiteko uneak, musika altu samarrarekin oihu egiteko aukerak…
Herritarrek harrera egin diete Lezoko kaian biei, eta haien segizioari. Handik plazarako desfilea egin dute den-denek. Livia Vila eta Oier Altuna Pirata Txikiak irrikaz zeuden udaletxeko balkoian, pozarren. Pirata Txikiek hizketaldia egin, eta suziria bota dute. Ondoren iritsi da Murixkaren agurra, eta erraldoi eta buruhandien kalejira. 20:o0etan dira egitekoak euskal presoen aldeko kartelaka, eta 21:00ak aldarea afari autogestionatua plazan. Gauean, 23:00etan, Iratzar taldearekin erromeria dago, Saldisen. Horiek gaurkoak. Biharko eta etziko egitaraua ikusteko, sakatu hemen.
