Pentsiodunek azken albisteen berri eman dute
Ostegunean Madrilen onartuko den lege proiektu baten salaketa eta Euskal Herriko Txirrindularitza Martxa izan dituzte hizpide.
Pentsiodunen manifestazioa Biteri kalera bidean.. Hilabeteko lehen astelehenean egiten duten bezala, gaur ere kalera irten dira Errenteria-Oreretako pentsiodunak, eta ohikoa den manifestazioari hasiera eman aurretik, azkeneko berriak helarazi dizkiete Herriko plazara bertaratu direnei. Pentsiodunek azaldu dute PSOE-k eta EH Bilduk berriki akordio bat sinatu dutela pentsio ez kontributiboaren igoeraren inguruan, %15eko igoera suposatuko duena.
Mugimendutik ikusi dute lege proiektu hori “arrisku” bat izan daitekeela, “pentsio pribatuei bidea irekitzen” dielako. Lege proiektu hori ekainaren 9an eztabaidatuko da, eta “ziurrenik” onartuko dela zehaztu dute pentsiodunek. Euskal Herriko Pentsiodunen Mugimendutik “uko” egin diote lege proiektu horri, eta erantsi dute esanez “inoiz” ez zuela argia ikusi behar. Hori dela eta, hilaren 9an bertan, osteguna, pentsiodunak Madrilgo Espainiako Kongresuan bilduko dira lege proiektu hori “atzera botatzeko eta ez onartzeko”. Errenteriarrak ere bertan izango dira “pentsioen pribatizazioaren aurka”.
Mugimenduko kideek baietsi dute 1.080 euroko pentsio publikoen borrokan irmo jarraituko dutela, eta “atzerapauso bat” den proiektu oro edo pentsioen pribatizazioari “bidea irekitzen” dion proiektu oro “salatuko” dutela.
Euskal Herriko Txirrindulari Martxa
Euskal Herriko pentsiodunek Euskal Herriko Txirrindulari martxa antolatu dute 1.080 euroko pentsio publikoen alde borrokan jarraitzeko. Martxa horrek Euskal Herria Iparraldetik Hegoaldera zeharkatuko du, herriz herri, eta hiriburuetatik igaroko da. Hilaren 13an, astelehena, hasiko da, Donostiatik. Errenteria-Oreretara azken egunean iritsiko da, hilaren 25ean, larunbata. Azken etapak Irun eta Donostia lotuko ditu, eta Gipuzkoako hiriburuan bukatuko da 11:30ean, ondoren 12:00etan manifestazio bat egiteko.
Errenteria-Oreretara 09:45ean sartuko da Lartzabalgo biribilgunetik, eta herria zeharkatuko du. Mugimendutik txirrindulariei sostengua emateko deia luzatu dute. Proiektu hori babesteko, zozketa bonuak saltzen egon dira bi euroko prezioan.
