Pasaiako gaztetxoek udarako jarduera programa antolatu dute
Pasaia-Lezo Lizeoko DBHko ikasleek Udaldia programa abiarazi dute, Pasaiako Udaleko Haur eta Nerabeen Eskubideen sailarekin elkarlanean.
Atzo goizean egin zuten aurkezpena Pasaia-Lezo Lizeoan ikasle antolatzaileek. 
Pasaia-Lezo Lizeoko DBH 1, 2, 3 eta 4ko ikasleek Udaldia programa antolatu dute, Pasaiako Udalaren Haur eta Nerabeen Eskubideen sailak gidaturiko parte hartze saioen bitartez. Iniziatibaren baitan, gazteek erabakitako jarduerak antolatu dituzte udarako.
Denera lau tailer egingo dituzte 2006-2011 urte bitartean jaiotakoentzat. Horien guztien ordutegia bera izango da: 10:00etatik 12:00etara, eta izena eman ahal izango da, doan, honako formulario honetan hilaren 17a baino lehen. Hauek dira tailerrak:
- Roller street patinajea. Patinetan hobeto ibiltzen ikasteko tailerra.
- Parkourra. Parkour hastapen tailerra eta kanpoko praktikak.
- Serigrafia. Poltsa, kamiseta edo norberak nahi duena bere kabuz diseinatzeko beharrezkoak diren ezagutza eta tresnak emango dituzte.
- Manga komikia. Manga edo komiki marrazkiak egiteko eta pertsonaiak sortzeko teknikak eta trikimailuak ikastea.
Ostiral berezietan zenbait jarduera ireki ere emango dituzte, 10:00etatik 14:00etara horiek, 2006-2011 urte bitartean jaiotakoentzat. Horietan ez da izenik eman beharko eta doakoak izango dira. Horra hor antolaturikoak:
- Kirolak itsasoan barna. Piraguismo eta padel surf kiroletara hurbiltzeko jarduera.
- Realarekin jolasean. Kirola praktikatzeko hainbat eremu instalatuko dira Trintxerpeko Aranederreko pistetan.
- Oztopodun zirkuituak. Hainbat oztopo gainditu eta ginkana handi batean parte hartzeko aukera izango da.
- Ur parkea. Ur-txirrista erraldoia, ur-zirkuituak eta ur-puzgarriez osatutako jolas eremua.
Argibide edo informazio gehiago behar duena arduradunekin harremanetan jar daiteke 943 34 40 34 (929 luzapena) telefono zenbakiaren bitartez edota posta elektronikoz mezua bidaliz. Honako diptiko honetan irakur daiteke programari buruzko informazio esanguratsu guztia.
