Hibaikak traineruak aurkeztu ditu
Arraun klubak emakumezkoen eta gizonezkoen ontziak aurkeztu ditu zaleez beteriko Gamon Zumardian. Bide batez, aurtengo aitabitxi eta amabitxia ezagutarazi ditu.
Hibaikako ontzien aurkezpena, Gamon Zumardian. Errenteria-Oreretan prest daude aurtengo traineruen denboraldia hasteko. Horrela irudikatu du gaur Hibaikak Gamon Zumardian egin duen aurkezpenean. Zaleez beteriko plaza batean, uretan lehiatuko duten ontzien arraunlarien izenak jakitera eman dituzte. Ekitaldiaren hasieran arraun elkarteko presidente den Jon Otegik hartu du hitza. Azken 11 urtean emakumezkoen eta gizonezkoen ontziak atera dituztela gogorarazi du, eta orain arte egindako zortzi hilabeteko entrenamenduen emaitza ikusteko desioa adierazi du.
Jarraian, emakumezkoen ontziko entrenatzaileak hitz egin du, Iñaki Mendizabalek. Helburuen artean, Euskotren Ligara igotzea eta Kontxako ohorezko txandan egotea. Bere esanetan, proiektu berria abiarazi du taldeak eta poztasuna adierazi du jende gaztea lortu dutelako. Aurreko denboraldiko ilusioari jarraipena emateko eskatu dio jendeari.
Ondoren, gizonezkoen traineruko entrenatzaile Josetxo Arrizabalaga zaleengana zuzendu da, eta baieztatu du kluba bere momentu onenean dagoela. Aurreko urteko denboraldiaren emaitzak hobetuko dituztelakoan dago, eta Hibaikari poliki-poliki bide berria irekitzeko aukera badagoela nabarmendu du.
Azkenik, aipamen berezia egin nahi izan diete arraun elkarteko gazteei: infantilak, kadeteak eta jubenilak. Harrobia zaintzeko deia egin du klubak. Bide batez, aurtengo aitabitxia eta amabitxia ezagutzera eman dituzte. Aitabitxia Luis Mari Moreno ‘Pirata’ da, eta amabitxia, aldiz, Erika Hernandez.
Hemen, Hibaikako bi traineruen partaideak (klik egin esteketan horietara joateko):
