Luzuriagaren etorkizuna ebazteko parte hartze prozesua gaur abiatuko da
Dagoeneko sortuta dago hausnarketa prozesua gidatuko duen 'talde eragilea'. Orotara 45 lagun inguruk parte hartuko dute bileretan.
Azpiegituraren etorkizunari buruzko erabakiak hartzeko bi talde sortuko dituzte. 
Luzuriaga eraikinaren etorkizuna erabakitzeko parte hartze prozesua gaur bertan hasiko da, Antxoko Kultur Etxean egingo den bilera itxi batekin. Saioa Conexiones Improbables aholkularitza enpresak dinamizatuko du, eta 8-10 bat antxotarrek parte hartuko dute, udalak ‘talde eragile’ izendatu duena osatuz.
Taldetxo hori Antxoko gizarte eta kultur eragileek osatuko dute, elkarteek ordezkari bana hautatu behar izan dutelarik euren izenean aritzeko. Bi bilera izango dituzte hil honetan, eta horietan partaideak saiatuko dira zehazten Luzuriagaren etorkizunari buruzko erabakiak hartzeko ardatzak zer-nola garatuko diren.
Izaskun Gomez alkatearen hitzetan, “ahalik eta ordezkaritza anitzena” hautatzen saiatu dira. Besteak beste, SOS Antxo Koordinakundeko, Bekoz Bekoko, Harremantxoko, Antxotarrok Historia Mintegiko edota jubilatuen taldeko bizilagunak elkartuko direla aurreratu du eledunak.
Talde eragiletik, zabala
Talde motor horretatik, aldi berean, ‘talde zabala’ jaioko da gero, eta 30-35 lagun inguruk parte hartu ahal izango dute horretan. Horiek, abiapuntutzat izango dute lehenengoen bileretan hausnarturikoa: “Eskatuko zaie talde eragilean egindako planteamenduak aberasteko eta zehazteko ekarpenak egin ditzaten”, azaldu dute.
Talde handiaren sorrerak txikia bera abiapuntu izango duela azaldu du alkateak: alegia, bertoko kideek proposatuko dute Luzuriagaren parte hartze prozesuan erabakiak hartzeko interesa eduki ditzaketen bizilagunak zeintzuk diren. Gehienez ere 35 kide elkartuko dira multzo horretan.
Gomezek nabarmendu du prozesuan gizarte-eragile eta herritarren lagin zabal batek parte hartuko duela, eta erabat ziur dagoela parte hartze prozesutik ateratzen den proiektua “Pasaiak eta pasaitarrek behar dutena” izango dela.
