Uda hasi aurretik abiaraziko du udalak Luzuriagako parte hartze prozesua
Paraleloki, "Antxoren etorkizuna definitzeko" mahai bat osatuko dute barrutiko eragile ekonomiko, sozial eta kulturalekin.
Luzuriagako bulegoekin zer gertatuko den erabakitzeko parte hartze prozesua abiaraziko du udalak. 
Pasaiako Udalak aditzera eman du Luzuriagako zentro berriaren erabilera eta edukiak definitzeko partaidetza prozesua uda baino lehen hasiko dela. Irailean, berriz, “Antxoren etorkizuna definitzeko” mahai bat osatuko dute barrutiko eragile sozial, ekonomiko eta kulturalekin.
Antxotarren nahi eta beharrak entzuteko prozesuak, beraz, bi ardatz izango ditu. Luzuriagari loturikoaren kasuan, bulegoen azpiegitura zaharrari zein erabilera eman nahi zaien aztertuko da. Mahai berrian, ordea, barrutiaren morfologiarekin, urbanizazioarekin eta behar diren zerbitzuekin zerikusia duten alderdiak aztertuko dira aurrerantzean.
Talde hori osatzeko Pasaiako alkate Izaskun Gomez hasia da, dagoeneko, Antxoko eragile ekonomiko, sozial eta kulturalei dei egiten. Alkateak ziurtatu du udalaren asmoa dela ahalik eta solaskidetza pluralenak biltzea, eta bertan merkatariak, ostalariak, kultur elkarteak, eragileak, enpresa txikiak, ekintzaileak eta bizilagunak, oro har, ordezkatuta egotea. Lehen fasean honakoak zehaztuko dituzte: aztertu beharreko gaiak, entzuteko prozesuaren helburua eta herritarren proposamenak txertatzeko erabili beharreko metodologia.
Bi entzute prozesuak batera garatuko dira. Hasteko epeak, ordea, desberdinak izango dira, esan bezala, Luzuriagakoa uda aurretik abiaraztea aurreikusi baitute udal arduradunek, eta urtaroa bukatzear denean, irailean, eragileen mahaiarena.
