Behin behinean, abian da 'Lezo hiri mugikortasun iraunkorreko plana'
Planak mugikortasuna, garraioa, landa eremua eta bestelakoak ditu ardatz. Herritarrek uztailera arte alegazioak egiteko aukera izango dute.
Lezoko hiri mugikortasun iraunkorreko plana aurkeztu dute. Maiatzeko udalbatzan “Hiriko mugikortasun iraunkorreko planari” onespena eman ostean, aste honetan zehar plana aurrera eramateko diagnostikoa eta ekintza plana zehaztu du udalak. Horretarako, foroak sortu, eragileekin elkarrizketak eta kale-inkestak egin dituzte. Planak zenbait ardatz izango ditu, eta bakoitzak aparteko ekimenak barnebilduko ditu: Oinezkoen mugikortasuna, ibilgailuen kontaketa, bizikleta bidezko mugikortasuna, genero ikuspegia (puntu beltzak), garraio publiko eta pribatua, aparkalekuak, landa eremua eta industria guneak.
Jesus Mari Martiarena, Lezoko alkatearen esanetan: “planaren helburua, Lezoko eta bere biztanleen mugikortasun jasangarria bultzatzea eta irisgarritasuna hobetzea da”. Bestela, Joxean Sanchez ingurugiro zinegotziak arreta jarri du planak ekarri ditzakeen ondorio osasuntsuetan. Haren esanetan, jarduera ezberdinek herritarren mugikortasun jasangarria sustatzeaz gain, kutsadura eta zarata murriztuko dute ere.
Orain, herritarrek planari ekarpena egiteko aukera dute, uztailera arte. Hemen sakatuta, nondik norako nagusien berri jakin daiteke.
