Erakusketa iraunkorren atzerabegirakoa Jantziaren Zentroan
Jantziaren Zentroak bost urte bete ditu aurten, eta 33 jantzi hautatu dira erakusketa iraunkor berrirako. Udako ilunabarretan ere bisitatu ahal izango da.
Jantziaren Zentroko erakusketa. Jantziaren Zentroak bost urte bete ditu aurten, eta urteurren berezi hori bihar izango dute gogoan, larunbatean; eta horretarako, kapitain-etxean zabalduko den erakusketa iraunkorra atzerabegirakoa izango da.
Bost urte horietan bost erakusketa iraunkor jarri dira Kapitain-etxean, eta orotara 163 jantzi erakutsi dira. Horien artean, 33 aukeratu dira erakusketa iraunkor berrirako. Proposamen berri hori Kapitain-etxearen lehen solairuan hasi eta bigarrenean bukatuko da, eta 33 jantziek modaren bilakaera ezagutzeko aukera emango dute, XVIII. mendetik 1960 arte.
Azken erakusketa iraunkorrean egin zen bezala, areto bakoitzean bi tablet jarri dira, bakoitzean jantzi bana bira osoan, eta 360 gradutan ikus daitezke. Bereizmen handiko 36 argazki dira, biraren hamar graduko bana.
Udan ilunabarrean zabalik
Aurreko bi udako eskaintzei eutsiz, uztailaren 2an eta abuztuaren 13an ilunabarretan bisita gidatu berezia eskainiko du Jantziaren Zentroak. Uztailaren 2an, 20:00etan, bisita euskaraz egingo da, eta 21:00etan, gaztelaniaz. Abuztuaren 13an, berriz, bi bisitak gaztelaniaz izango dira; lehena 20:00etan, eta bigarrena, 21:00etan.
Bisita gidatuek ordu eta erdiko iraupena dute, eta sarrerek bost euroko prezioa dute. Bertan parte hartzeko aurrez izena eman behar da. Horretarako, bi bide balia daitezke: Errenteriako turismo bulegora deituta (943 49 45 21) edo jantziarenzentroa@errenteria.eus helbidera idatzita.
