Antxo Areto Futbola Bigarren B-ra igo da; eta ospatu dute
Laskorainen kontrako lehia estuaren ondoren, liga lehen bukatzeagatik lortu du kategoriaz igotzea antxotarren areto futboleko lehen taldeak.
Aski izan ziren zuri-gorriekin igoera ospatzeko zelaira jaitsi ziren zaleak. 
Jendez gainezka egon zen Donibaneko kiroldegiko harmaila nagusia joan den larunbat arratsaldean, eta arrazoirik bazen, Antxo Areto Futboleko lehenengo taldeak Bigarren B Mailara igotzeko finala izan baitzuen jokoan bertan, arratsaldeko 18:00etan. Eta egin-egin zuten.
Oso lehia estua izan zen. 4-4 bukatu zen Laskorainen kontrako partida, eta luzapenean ere bana berdindu zuten Gipuzkoako Hirugarren Mailako bi talderik onenek. Hori horrela, antxotarrek liga lehenengo postuan bukatu izanagatik, haiena izan zen kategoriaz igotzeko txartel bakarra.
Luzapeneko azken segundoekin hasi ziren zaleak igoera ospatzen, eta ez ziren gutxi izan denbora-kontagailuaren bukaerako hotsarekin batera harmailetatik zelaira jauzi egin zutenak, jokalariekin eta klubeko arduradunekin lorturikoa ospatzeko. Besarkadak, dantza, zirrara-oihuak, zorionak, xanpaina… eta aski amesturiko kopa bat.
Hori eskutan, ospakizunari ekin zion Pescados Ferreresen familia erraldoiak. Alkartasuna Dantza Taldekoek harrera beroa egin zieten jokalariei Antxon, eta kalejira zuri-gorriak barrutiaren kale nagusiak hartu zituen. Afariak eta ondorengo jaiak ez zuten inor ezaxola utzi.
