Jaietan gerta litezkeen eraso matxisten aurrean zer egin azaldu du udalak
Barrutietako jaiak heltzear, zenbait informazio txartel sortu dituzte udal arduradunek, prebentzioaren eta biktimen babesaren alde.
Argazkian EH Bilduko udal ordezkaririk ez dagoen arren, ohartarazi dute udal talde guztiek egin dutela bat adierazpenekin. 
Pasaiako Udaleko arduradunek zenbait informazio txartel banatuko dituzte etxez etxe datozen egunotan, heltzear diren barrutietako jaietan eraso matxistak prebenitu edota horiek eragin litzaketen biktimak babeste aldera.
Udalean ordezkaritza duten lau alderdi politikoek aho batez adierazi dute alor horretan elkarlanean jardungo dutela. “Indarkeria matxista prebenitzeko politikak indar daitezen, jai-eremu inklusiboak eta emakumeen aurkako indarkeriarik gabekoak sortzeko baldintzak bermatzearren”.
Testuinguru horretan, argi utzi dute sexu erasoak egiturazko indarkeria testuinguru batean ematen direla ezinbestean, eta indarkeria mota hori ez duela festa giroak eragiten, baizik eta “giro hori hartzen dela erasoa egiteko aitzakiatzat”. Udal arreta zerbitzuak egoera horietara egokitu daitezen eta biktimek lehen mailako arreta egokia jaso dezaten lanean jarraituko dutela esan dute.
Informazio txartelak
Ekin diote udalaren izenean informazio eskuorriak banatzeari. Jaietan gerta daitezkeen eraso matxistak prebenitzeko eta eraso bat bizi edo ikusiz gero, nola jokatu eta laguntza non eskatu azaltzea dute helburu. Halaber, aholkularitza eta informazioa eskuratzeko eta salaketa jartzeko bideak ere jaso dituzte txarteletan.
Horrekin batera, eraso sexista, homofobo, xenofobo eta transfoborik gabeko jaien aldarria ere aterako du kalera udalak: “Jar dezagun denok gure alea, jai askeak, aniztasunaren aldekoak eta parekideak izan daitezen!”.
Informazio txartelen diseinua hemen klik eginda ikus daiteke.
