[Galeria] Iragarri gabeko 'flashmob' bat egin dute Euskaraldiaren erritmora
Atzoko 19:30a inguruan hainbat dantzari eta bizilagunek 2020ko Pasaiako Euskaraldiaren abestiarekin dantza egin zuten Gudarien plazan.
Geroz eta jende gehiago batu zitzaion Euskaraldiaren abestiaren erritmora egindako dantzari. 
Atzoko 19:30a pasatxo zen eta, bat-batean, 2020ko Euskaraldirako Pasaian egindako abestia entzuten hasi zen Trintxerpeko Gudarien plazan. Neska bat dantzan hasi zen doinuaren erritmora, eta orotariko dantzari nahiz bizilagunak batu zitzaizkion abestiak aurrera egin ahala.
Askotariko dantzariek barrutiko plaza bete zuten, bertako terrazetan poteatzen ari ziren bizilagunen nahiz ondoko parkean jolasean ari ziren haur eta familien sorpresarako. Izan ziren, halaber, jakin-gose, inguruko eraikinen balkoi eta leihoetara irten zirenak, behean zer gertatzen ari zen jakiteko.
Dantzarien inguruan zenbait kamerari ikus zitezkeen, emanaldia detailez detaile grabatu zutenak. Dantza bukatzean, baina, inork ez zuen azalpenik eman. Dantzariak sakabanatu eta jakin-minez, seguru, berrekin zieten bizilagunek terrazetako solasaldiei, eta txikiek ere jarraitu zuten baloiak ostikatzen.
Ustezko flashmob hori sortu zutenen artean badaude Pasaiako aurpegi ezagunak; zerk eta zergatik batu zituen atzo Gudarien plazan, ordea, ezjakina da. Argi dagoena da doinua ez zutela ausaz hautatu, eta heltzear den Euskaraldiak baduela hor zerikusirik…
