Ostalaritzaren plan estrategikoa aurkeztu dute
Ostalaritzaren sektoreak aldaketa nabarmenak jasan ditu azken urteetan, eta etorkizunera egokitzeko neurri eta erronkak garatu dituzte.
Ikertalde, udal, Errenkoalde eta Ostariko ordezkariak, Diputazio plazan. Pandemiaren eraginak baretu dira, eta badirudi atzean utzi direla neurriak eta murrizketak, baina pandemia garaian eraginak gordinen jasan zituen sektorea ostalaritzarena izan zen, hilabete askoz euren negozioak itxita izan baitzituzten, eta irekiko aukera izan zutenean, jarraitu beharreko neurriek ito baitzituzten. Horrez gain, egoera horri herritarren ohituren aldaketa gehitu behar zaio, eta ostalariak etengabeko egokitzapenean igaro dituzte azken hilabeteak. Hori dela eta, Ostari ostalarien elkarteak, Ikertalde enpresarekin batera, eta Errenteriako Udalaren laguntzarekin, Errenteria-Oreretako ostalaritzaren plan estrategikoa osatu dute, eta atzo aurkeztu zuten Diputazio plazan, Aizpea Otaegi alkateak, Eneko del Amo Hirigintza zinegotziak, Ikertaldeko Gorka Goikoetxeak, Maika Martin Errenkoaldeko presidenteak eta Ostariko ordezkariek.
Plan estrategiko hori garatzeko, lehenik eta behin herriko ostalaritzaren diagnosia egin zutela azaldu zuen Goikoetxeak, egoera nolakoa zen aztertzeko. Diagnosi hori osatzeko inkestak egin zituzten herritarren kontsumitzeko ohiturak nolakoak diren jakiteko, eta bertan kontsumitzeko ohitura horiek aldatu direla identifikatu zuten, pandemiak, dudarik gabe, areagotu dituenak.
Diagnosia eginda, ekintza-plan bat garatu zuten ostalariek bizi duten egoera berriari egokitzeko. Horretarako, sei ardatzetan eraikitako plan bat osatu dute, honako ildoak jorratzen dituena: hirigintza; talde kohesioa; digitalizazioa; lehiakortasuna eta berrikuntza; sustapena, dinamizazioa eta komunikazioa; eta gobernantza, rolak eta planaren dinamizazioa.
Ostarik garatutako lana
Ostariko kide den Natxo Simonek nabarmendu zuen pandemiak eraginda ostalaritzak “asko sufritu” duela azkenaldian, eta horri “ziurgabetasun” egoera gehitu behar izan zitzaiola, ez baitzekiten etorkizunak zer ekarriko zien. Pandemiak enpresariak euren negozioak “berrabiatzea eta egokitzea” eraman die, sortutako egoera berrira “moldatuz”.
Hori dela eta, “zer-nolako” ostalaritza nahi zuten planteatzen hasi ziren, egoera berriari ahalik eta ondoen egokitzeko. Horregatik, Ikertalderekin batera, Errenteria-Oreretako ostalaritzaren plan estrategikoa garatu dute, etorkizunera begirako zenbait erronkekin; hala nola, talde kohesioa eraikitzeko ostalari guztien inplikazioa lortzea; sektoreko bilerak egitea; lehiakortasun hobetzea; animaziorako eta dinamizaziorako jarduerak garatzea; lan poltsa bat osatzea; eta formazio ikastaroak antolatzea.
