Oiartzuarrak, Gipuzkoako onenak
Kadete eta jubenilen garaipenekin Eskuz Binakako Gipuzkoako Herriartekoaren txapela eskuratu du Oiartzunek. 2017ko eta iazko arantza hori kendu dute gaur Azpeitiaren kontra.
Oiartzunek lortu du, 2017ko eta iazko arantza hori kentzeko gai izan dira herriko pilotariak. Eskuz Binakako Gipuzkoako Herriarteko txapeldun izan baita Oiartzun gaur, Donostiako Atano III pilotalekuan. Aurten bai, Azpeitia gailentzeko gai izan dira oiartzuarrak. Izan ere, Oiartzunek aurretik jokatutako bi finalak (2017koa eta iazkoa) Azpeitiaren kontra galdu zituen. Arantza kendu dute, nola gainera!
Oihan Etxeberria eta Mikel Leonetek eskuratu dute lehen garaipena, kadete oiartzuarrek Iker Otaegi eta Oier Larrañaga gailentzeko gai izan baitira, erraz gainera (22-7). Oier Zabaleta eta Unax Landa jubenilek ere euren partida irabazi dute, arazo handirik gabe hauek ere (22-10).
Nagusien partidan 22-10 galdu zuen Oiartzunek, Imanol Ugaldek eta Eneko Zabaletak ezin izan zuten asko egin Iker Egigurenen eta Josu Labakaren jokoaren aurrean. Baina jada esku artean zuten herriartekoa oiartzuarrek, eta gazitik baino, gozotik izan zuen horrek ere.
Gaurkoa herrira ekartzen duten bigarren txapela da, 2013an irabazi zuten oiartzuarrek lehena.
