Abuztuan bukatuko dituzte Olazar errekako lanak
Uztailean ziren bukatzekoak lanak, baina elektrizitate azpiegitura berrantolatu behar izan delako abuzturako izango dira eginak.
Lezoko Udalak iragarri du abuztuan bukatuko dituztela Olazar errekaren estaldura kentzeko lanak, Eugenio Otxoa kalearen ingurukoak. Berez, uztailean ziren bukatzekoak lan horiek, baina Iberdrolaren sarearekin izandako egokitze lanengatik (konexioa berrantolatu behar izan da), abuzturako aurreikusi dute obra horien egikaritzea.
Ura Agentziak zehaztu du Iberdrolarekin konpondu beharreko egokitze horiek uztailaren erdialdera arte iraungo dutela. Beraz, udalak inguruko bizilagunei batez ere barkamena eskatu die atzerapenagatik.
Lan horien asmoa da errekaren emaria handitzea, hori aire zabalera eramanez (orain arte tapatua egon da), baita ingurunea leheneratzea ere. Hala, uholdeak saihestuko lirateke errekaren emaria zabaldu delako, eta aldi berean, inguruko garajeetara izaten diren ur filtrazioekin bukatuko dute. Lanak bukatu arte inguruko bizilagunek autoak Algeposan aparkatzeko aukera dutela oroitarazi du udalak. Horretarako baimena eta giltza eskuratu behar dituzte.
