Normaltasunera itzuli da Xorrola zerbitzua
Atzo goizean greba hasi zuten langileek, baina arratsaldean ohiko normaltasunera itzuli ziren, Autobus Cuadra S.L. enpresarekin akordio batera iritsi baitziren. "Guztiontzako zerbitzu duina, segurua eta kalitatezkoa" aldarrikatzen ibili dira azken asteetan.
Ordu gutxi batzuk iraun ditu Xorrolako langileen grebak, atzo (hilak 27) goizean hasi eta arratsaldean bertan bukatutzat eman zuten, Autobuses Cuadra S.L. enpresarekin akordio bera heldu ondoren. Goizean zehar zerbitzu minimoak eskaini ondoren, arratsaldean itzuli ziren normaltasunera autobus gidariak, hala jakinarazi zuten sare sozialetan. “Eskerrik asko egun hauetan helarazi diguzuen elkartasuna, eta barkamena eskatzen dizuegu grebaren ondorioz eragin ahal izan ditugun eragozpenengatik”, esan zuten.
Udalak azpikontratatutako Autobuses Cuadra S.L. enpresari atxikita egon dira orain arte bi langileren kontratuak, udalaren baldintza-agiriaren bidez. Langile hauek, astean berrogei orduz lan egiteaz gainera, enpresa esleipendunak “Oiartzungo kontratuaz kanpoko beste zerbitzu batzuk egitera behartzen” dituela salatzen ibili dira, “lan eskubideak urratuz eta lan eta zerbitzuko segurtasuna bermatu gabe”. Askotan 10, 11 edo 12 ordu jarraian lan egin behar izan dutela diote, maiz jardunaldia bikoiztuz, “horietako langile bat Oiartzungo kontratuaz kanpoko beste zerbitzu batean zegoelako”.
Ez da lehen aldia “lan eskubideak eta segurtasun neurriak urratzeagatik” enpresa salatzen dutela, hori esan zuten atzo sare sozialetan zabaldutako oharrean. “Horri buruzko irtenbideak bilatzeko erakutsi den utzikeria ikusita”, greba egiten hastea erabaki zuten atzo goizean. Eskaeren artean, Xorrolako langileek zerbitzu honetarako bakarrik lan egin dezatela jaso zuten, eta “nola ez, guztiontzako zerbitzu duina, segurua eta kalitatezkoa” nahi dute.
