1.000tik gora kilo hondakin jaso ditu udalak
Maiatzean Altzibar eta Iturriotz auzoak garbitu zituzten, eta ekainean berriz, Talaia poligonoko eta Mamut atzealdeko eremuak txukuntzen ibili ziren.
Azken bi hilabeteetan Oiartzun ibaian eta herriko erreketan hainbat garbiketa saio egin ditu udalak. Maiatzean Altzibar eta Iturriotz auzoak garbitu zituzten, eta ekainean berriz, Talaia poligonoko eta Mamut atzealdeko eremuak txukuntzen ibili ziren.
Datuei erreparatuta, orotara, 1.010 kilogramo hondakin bildu dituztela jakinarazi berri du udalak: 91 plastiko botila, 43 kristalezko botila, 178 lata, 43 kilogramo plastiko, 81 kilogramo arropa, 664 toallatxo eta erosketarako erabiltzen diren hiru gurditxo.
«Berebiziko garrantzia du ibai-erreka bazterrak garbi mantentzeak, itsasora iristen diren hondakinen %80 ibai-erreka eta lurreko batur guneetatik iristen baita», esan dute udaleko iturriek. Jada uda izanik, datozen aste eta hiletan ingurumena zaintzeko deia egin diete oiartzuarrei.
