Urdaburuk asteburu pasa antolatu du Abauko bordara
Uztailaren 9ko eta 10eko astebururako antolatu dute mendi irteera, bi ibilaldirekin. Izen-emateak irekita daude dagoeneko.
Abauko borda. Urdaburu Mendizale Elkarteak Abauko bordara (Huesca) irteera antolatu du uztailaren 9ko eta 10eko astebururako. Horretarako, autobusak antolatu dituzte: larunbatean aterako dira 07:00etan Zumarditik, eta 07:15ean Aritzetatik.
Bi egun horietan bi ibilaldi egingo dituzte. Lehena larunbatean egingo dute, Santa Engrazi eta Belagoako aterpearen artean. 11 kilometroko etapa izango da, eta bost orduko iraupena izatea aurreikusten dute. Bigarrena, berriz, igandean izango da, eta Zuriza eta Linza lotuko ditu. 15 kilometroko txangoa izango da, eta sei ordu eta erdiko ibilbidea osatuko dute mendizaleek.
Mendizale elkartetik zehaztu dute eguneko motxila eramatearekin aski dela. Larunbateko gaua Abauko bordan egingo dute, eta maindireak edo zaku arin bat eramatea eskatu dute.
Asteburu osoko prezioa, autobusa eta borda barne, 45 eurokoa da bazkideentzat eta 50ekoa bazkide ez direnentzat. Plazak mugatuak dira, eta norberak berea erreserbatzean, konfirmazio email bat jasoko du. Ondoren, 45 edo 50 euroko diru-sartzea egin beharko dute elkarteko kontu korrontean erreserba konfirmatzeko.
Izena emateko azken egun uztailaren 7a, osteguna, izango da, eta hiru modutara egin daiteke: presentzialki astearte eta ostegunetan, 19:00etatik 21:00etara Urdaburuko egoitzan; 943 52 78 79 telefonoan; edo online galdetegi baten bidez.
