Lezoko EH Bilduk Ekialdebusen zerbitzua hobetzeko proposamenak egin dizkio aldundiari
Lezoko industrialdea aintzat hartzeko lineen berregokitzea eskatu dute. Aldi berean, maiztasunak handitzea proposatu du koalizioak.
Lezoko EH Bilduk Ekialdebusen zerbitzua hobetze aldera landu dituen proposamenak helarazi dizkio Gipuzkoako Foru Aldundiari. Oarsoaldeko eta Bidasoko lineei dagozkie hobekuntza horiek, Lezon eragina dutelarik linea horiek. Hala, koaliziokideek uste dute trantsizio ekologikoaren alde urratsak egiteko garraio publikoaren aldeko apustua egin behar dela. Baina aldundiak egindako azken proposamenen harira (datorren hamarkadan egungo zerbitzuak mantentzearen alde egin dute), EH Bilduk uste du prozesua herritarrekin partekatu behar zela, “herritarrei berrantolaketari buruzko informazioa helaraziz eta auren partaidetza bilatuz”.
Honakoak dira EH Bilduren proposamenak (behekoak). Esan dutenez, zerbitzuak zabaltzeko, eta egungo lineen artean ahalik te konexio onenak bilatzeko asmoa dute proposamenek. Aldi berean, garraiobidearen prezioa gutxitzearen aldeko apustua egin du EH Bilduk.
- Lezoko industrialdera zerbitzua, linea berriak ezarriz. Horretarako, bi proposamen:
- Hondarribia-Irun-Lezo-Donostia (E27aren ibilbidea): Letxunborro hiribidea 59 (Irungo suhiltzaileak)-Gaintxurizketa gaina- Lezoko industrialdea- Lezo- Kaputxinoak- Pasai Antxoko Renfe-Buenavista. Astelehenetik igandera, ordu erdiko maiztasunarekin.
- Oarsoaldea mailako linea zirkularra: Errenteria-Arraguako topo geltokia-Lanbarren industrialdea-Gaintxurizketa-Lezoko industrialdea- Lezo- Lezo/Errenteria tren geltokia. Ordu puntetan, langile gehienen sartu eta irteerak bermatzeko.
- EHUko Gipuzkoako Campusera linea berria: P. Donibane- Lezo- Errenteria- P. Antxo- Ibaetako campusa. Astelehenetik ostiralera: goizean, eguerdian eta arratsaldean.
- Maiztasunak handitu:
- Pasai Donibane- Lezo-Donostia (E01): Gaur egungo ordu puntetako maiztasuna handitu, ordu puntetan jendez gainezka joaten baita autobusa.
- Ospitalerako zerbitzua handitzea (E03). Lan egunetan eta larunbatetan, ordu erdiroko zerbitzua, eta igandetan eta jaiegunetan, orduero.
