Osasun publikoa babesteko eta indartzeko eskatu du EH Bilduk
Atzoko osoko bilkuran, mozio baten bidez, hiru eskakizun egin zituen Pasaiako EH Bilduk. PSE-EEk eta EAJk proposamen horien aurka bozkatu zuten.
Lehen Arreta indartzeko egindako elkarretaratzeko argazkia. Pasaiako EH Bilduren ustez Osakidetza “kinka larrian” dago eta honakoa, Eusko Jaurlaritzak azken urteetan hartu dituen erabakien ondorioa dela nabarmendu zuten. Etenik gabeko arreta guneak ixtea, ordutegiak murriztea edo profesionalen gabezia dira atzoko udalbatzarrean EH Bilduk azaldu zituen arazoetako batzuk. Ondorioz, herritarrei kalitatezko arreta bermatzea eta kontsulta presentzialak lortzea “zailagoa” dela argudiatu zuten. Arazo horri aurre egiteko, osasun publikoa babesteko eta indartzeko, mozio bat aurkeztu zuten.
Mozio horren bidez, hiru eskakizun egin zizkioten Eusko Jaurlaritzari:
- Urte osoan zehar herrietako osasun sistema publikoak eskaintzen dituen zerbitzuak bermatu ditzala.
- Mediku egoiliarren kontratazio eredua aldatu dezala; kontratu egongorrak ezarriz eta baldintzak hobetzeko asmoz kontratazio irizpideak aldatzeko azterketa bat eginez.
- Eta Lehen Arretako profesionalen kopurua handitu dezala.
Dena dela, gobernua osatzen duten PSE-EEk eta EAJk mozioaren aurka bozkatu zuten.
