Andonaegiko obrei buruzko informazio saioa egingo dute bihar
Auzoko bizilagunek eskatu ahal izango dituzten laguntzen berri eman nahiz aholkularitza bulegoari buruzko xehetasunak azalduko dituzte.
Bihar, asteartea, informazio saio bat eskainiko dute Andonaegiko frontoian 18:00etan, euren etxebizitzak birgaitu nahi dituzte auzo horretako bizilagunek eskatu ahal izango dituzten laguntzen berri emateko. Aurkezpenean udal ordezkariek eta informazio bulegoko talde teknikoak parte hartuko dute, eta aurreratu dute proiektuaren %30etik %50era bitarteko finantziazioa eskuratu ahalko dutela atxikitako pasaitarrek.
Eraikinen irisgarritasuna eta energia eraginkortasuna hobetu nahi duten obrek, guztira, 8 milioi euroko zuzkidura dute. Diru horrekin espazio eta bide publikoak berrurbanizatzeko eta hobetzeko lanak egitea aurreikusi du udalak.
Bulego berri bat
Bizilagunei aholkularitza pertsonalizatua eskaintzeko informazio bulego bat gaitu dute Andonaegiko Jauregiko zaindariaren etxea izandakoan. Bertako teknikariek pasaitarrek jaso ahal izango dituzten laguntzen berri emango diete bertaratzen direnei. “Azalduko diete zein jarduketa sartzen diren planaren barruan eta zein laguntza dagokien jarduketa horiengatik”, zehaztu dute udaletik.
Bulego horren ordutegia honakoa izango da: astelehenetik ostiralera 9:00etatik 14:00etara, eta asteazkenetan 15:00etatik 17:30era. Hitzordua edo bilera eskatu nahi dutenek 943 00 43 05 telefonora deitu edo WhatsApp mezua bidal dezakete.
Pilota, bizilagunen teilatuan
Izaskun Gomez alkateak nabarmendu du auzoko pertsonek erabaki behar dutela parte hartu nahi duten ala ez. Eusko Jaurlaritzaren aurrekontuetan sartuta dauden funts horiek lortu ditu Pasaiako Udalak, eta eledunak gaineratu du jabeen erkidegoei “beharrezko laguntza guztia” emango dietela birgaitze proiektuak aurrera eramateko eta dagozkien laguntzak eskuratzeko.
